美國海軍同海岸防衞隊船艦上月底穿越台灣海峽，引起中方關注。其中海岸防衞隊巴索夫號（Bertholf WMSL 750）緝私艦噚日起訪港，係海岸防衞隊17年以嚟首次有海巡艦訪港，船艦停泊尖沙嘴海運碼頭。
艦長︰係最愛嘅海港之一
巴索夫號艦長John Driscoll噚日帶香港傳媒參觀船艦甲板同控制室。艦首仲配備自動炮火系統「Bofors 57 mm gun」，不過就只能遠觀喇。巴索夫號係「傳奇級」遠洋防衞艦，排水量4,500噸、船長418呎，最高航速可達28節，主要負責緝私、緝毒工作，上年試過喺東太平洋海域查獲約2.3公噸可卡因，認真威水。
Driscoll同八方講，巴索夫號有113個主要船員，有一個係香港人，喺艦上做技術專家。佢話，香港係佢其中一個最愛嘅海港，今次會停泊香港幾日，船員會放吓假同去社區交流吓，但之後船艦會去邊度就唔方便透露喇。佢又話之前穿越台海，美國政府係按國際法允許嘅任何地方航行同行動，強調支持美國國家安全目標。