前特首梁振英日日喺facebook同《蘋果》計住有幾多個廣告，已經唔係新聞，網民連笑佢都費事，但前日網上突然流出一張「梁振英死於今個星期一，享年64歲」嘅貼圖，引起網民議論紛紛，不過冇幾耐又有網民報告689已經「翻生」，而最搞笑係話689死過翻生嘅「人」，原來又同蘋果有關！
嗱，呢個蘋果就同《蘋果日報》冇關，而係生產iPhone嘅蘋果公司，話說前日有網民發現，佢用iPhone嘅人工智能助理軟件Siri問「梁振英死咗未？」Siri竟然答佢：「梁振英死於今個星期一，享年64歲。」
疑錯引維基惡搞資料
網民見到咁梗係第一時間cap圖放上網，之後好多網民跟住玩，發現Siri真係咁答，即係唔係改圖！正當好多網民爭相轉告689被Siri「宣佈」死咗，幾個鐘之後Siri又「宣佈」689已「復活」，再問佢689死咗未，Siri答「仍然在生」！
點解人工智能嘅Siri會搞錯？原來Siri聲稱答案引用自《維基百科》嘅中文資料，有網民發現Siri引用入面嘅689逝世日期為「今個星期一（64歲）」，但資料喺《維基百科》提及梁振英嘅中文條目就冇，不過《維基百科》話有關條目曾被人惡意破壞，正被封鎖到本月20日，令人懷疑係咪有人惡搞689個條目，改成佢「今（上）個星期一」死咗，結果連Siri 都俾《維基百科》誤導？
李八方
