林敏驄喺賀歲片《如珠如寶》身兼編導演三職，該片就係冠軍娛樂出品，而創作歌手曹震豪上年3 月曾喺微博貼出喺冠軍娛樂嘅辦公室幫阿驄慶祝生日兼留言：「@ 林敏驄，生日party 暨冠軍娛樂soft-launch ，祝大師生日快樂，新公司大展鴻圖！」
公司登記未結業
其中一張相，見到櫃入面放咗阿驄嘅音樂獎座、牆上又有佢嘅大相。根據公司註冊處紀錄，冠軍娛樂有限公司未結業。馮仁昭日前上過去觀塘冠軍娛樂，發現公司重門深鎖，似係人去樓空，公司玻璃門就俾管理處貼追租告示，因為公司係四個相連單位，據知每月租金總數約57,220 元，管理處指簽咗三年租約，但租咗一年就搬走兼欠租幾個月。
阿驄日前回覆否認係老闆：「吓！又有我份，咁又關我事？嗰間公司唔係我㗎，我幫佢哋做顧問，兼職接job 拍吓嘢，《如珠如寶》都拍完啦，叫好叫座，我又拍緊第二套，部部電影都唔同老闆，佢哋租約嘅嘢，我唔清楚，你哋問番佢哋。我只係幫佢哋搞創作，租約唔係我簽，我又未見過張租約，月租幾錢都唔知。」
撰文：馮仁昭
