上星期六英超嘅護級大戰，般尼主場2:0擊敗尾3嘅卡迪夫城，領先對手多達11分，護級接近成功，場波仲發生咗一單充滿愛嘅衝突，般尼前鋒艾殊利班尼斯喺完上半場前，不滿卡城守將祖爾賓納迪嘅攔截太凶狠，起身就同對方口角兼想用頭掂對方凶吓佢，但班尼斯有身高優勢，佢就借機輕力連咀賓納迪個鼻兩啖，咁甜蜜可能球證唔抵得，畀佢哋兩個一人一張黃牌。
事件發生嗰陣，兩邊球員見兩人想打交咁，當然衝過嚟做和事佬，但班尼斯就好冷靜，嘟長個咀去錫賓納迪個鼻兩啖，用愛與和平解決咗件事，而賓納迪又冇乜反應咁。不過球證就冇放過呢對「情侶」，雙雙判罰黃牌。事發後，英格蘭名宿連尼加喺twitter食花生：「班尼斯錫咗祖爾賓納迪個鼻，唔係一次而係兩次，好彩佢冇收到兩張黃牌。」
卡城再輸就降班
雖然兩人咁有愛，不過場波都係要分勝負，般尼今場31分鐘，靠基斯活特近門頂入先開紀錄，去到完場前補時，般尼嘅杜韋麥尼爾左路地波傳中，卡城後衞同門將出現誤會，個波碌去尾柱，俾基斯活特執雞整多粒，般尼贏2:0之後，已經有39分，相反卡城就大劑，得28分排尾3，落後踢少場嘅白禮頓五分。白禮頓星期二會喺英超主場對卡城，名副其實係護級大戰，但對於卡城嚟講，贏唔到的話同提早降班冇乜分別。
列斯聯都唔執輸
同日英冠都有單錫錫事件，2哥列斯聯主場1:0贏錫周三，直接升班席位穩固咗少少。積夏里遜65分鐘入波後，成班球員梗係一齊慶祝，中堅邦圖斯贊臣就趁機攬住前鋒阿里奧斯基錫佢塊面，俾人偷襲之後，阿里奧斯基個樣都幾嫌棄，睇嚟佢就唔太享受邦圖斯贊臣嘅一吻喇。
而喺球場上面，最經典嘅錫錫就梗係球王馬勒當拿同肯尼基亞，1996年佢哋一齊踢小保加，一場聯賽對河床嘅宿敵大戰，「風之子」就連中三元，老馬激動到捉實佢嚟嘴對嘴深情一吻。喺2010年，曼聯作客同市宿敵曼城，史高斯一箭定江山贏1:0，隊長加利尼維利亦都捉實史高斯個頭，托實佢塊面嚟強吻佢個嘴。另外意大利千禧年代頭嘅前鋒韋利同恩沙基，都試過着住國家隊制服嚟錫錫。