後生人要入我的老本行，他父母派遣來問過來人指點順路；看他肥嘟嘟一身圓渾，好個福氣代言人，不禁笑着嘆息……小朋友，除非閣下天份及運氣媲美Lee Alexander McQueen，不然稍為修修，首先對健康有益，入呢行好睇賣相。
對方渾然不覺：即係……？
陪伴在側百般照應佢阿媽即搶答，我地仔仔好健康，從幼兒Play School開始，一直係開心果，男女老幼無任歡迎。講開又講，你嗰行個邊個、邊個都唔係好靚仔啫……
吹脹！
事後跟佢老竇溝通：你家仔仔天生異禀，十八歲未到120公斤，比較合適入娛樂圈，肥姐去後雖然有欣宜同細細粒接棒，但六師弟之後無以為繼，缺男生福氣代言人，如果肯將你仔仔放入公仔箱又或大陸娛樂網絡，我擔保：一定贏！淨係年尾先扮聖誕老人，隨後過年財神到，重有通勝封面，前途無可限量，定必盤滿缽滿。
咁，點幫仔仔減肥呢？重有……邊位係Lee Alexander McQueen啫？佢老竇問。
首先問仔仔識唔識McQueen？
就快18歲，想讀時裝設計，如果唔識McQueen，不如即係選Plan B。後生細仔新陳代謝比我等老皮老肉肯定以倍計的快，老曹個細仔曾經肥到呢；16歲開始地獄式訓練，至19歲大學一年班成功減去40公斤，家陣1米85、80公斤，過去三年除過年過節生日，日日白烚芥蘭花椰菜花雞胸肉，零澱粉，零脂肪，另外加入籃球隊，而家？簡直全校大過佢細過佢嘅師姐師妹師兄師弟，無不視為至重量級小鮮肉、天菜王！
肥不是罪！然而浮花似錦時裝世界，肥；某程度上是罪無可恕的罪狀，一種不顧身勢有辱「家門」的罪大惡極。聖羅蘭由始至終官仔骨骨。老佛爺Karl Lagerfeld年近七十減去數十公斤肥膏，為求塞入超窄剪裁 Dior Hommes，堅持直至離世不容反彈。Tom Ford閃爍着一雙桃花眼，微解幾粒胸前鈕扣，但求露出緊緻胸肌上幾撮鬈曲胸毛。John Galliano每次謝幕必然費盡心機，但求攝影師拍到手軟，也是一種語不驚人死不休。唯獨早期McQueen摒棄公認設計師模式；圓胖身形，配套天真爛漫的笑容，在演出區域邊跑邊笑奔波到台前謝幕，拋上拋落圓鼓鼓的肚腩在空氣中浮盪，為觀眾驚艷的掌聲、歡呼聲，增加了不少笑聲。在此之前只有另一位設計師笑着、跳着謝幕，那時多麼快樂、多麼幸福？隨後加入大集團，身光頸靚之餘，體重下降，笑靨漸次消失；再下來自選一命嗚呼，百年不遇的天才，就此告別人間；看着現時公映《英倫壞男孩：McQueen》誰不惋惜？唏噓讚嘆！