湛琪清今年2月結婚榮升金太，婚後老公幫她成立social media生意及送了一間美容院給她。訪問當天幸福笑臉不在話下，口中常說自己lucky，學會感恩相信才是最大收穫。
撰文：羅慧敏
攝影：林德雄
汪詩詩表妹湛琪清今年尾才踏入人生的29+1，兩個月前跟拍拖兩年的潘廸生外甥金承威（Kenneth）拉埋天窗，於君悅酒店筵開50席豪門夜宴，眾名流到賀，湛琪清現為豪門金太，用幸福滿瀉來形容一點也不過份，臉上總是掛着燦爛笑容，「lucky」這字一直都從她口中出現，最近老公還送了兩個「BB」給太太，投資百萬開設social media公司與美容院給她打骰，湛琪清眼中的老公為完美好男人。
收美容院禮物
湛琪清日前接受專訪時說：「我覺得自己好lucky，我哋兩個好夾，Kenneth係個好人，佢好聰明，佢教我好多嘢，係個好好嘅老公。我老公做好多唔同嘅嘢，做科技、餐廳、美容、投資，佢好鍾意做嘢，Kenneth睇到我會幫一啲朋友做嘢，佢覺得我可以建立自己social media嘅生意，我開頭都覺得冇可能，跟住佢用咗一日時間幫我做咗個website，一個星期後就on line了。我哋第一個客係Netflix，我哋真係lucky到爆，到𠵱家已經幫佢哋做咗八、九個廣告，仲有時裝、慈善機構同其他嘅客都有。」
老公背後的支持，令湛琪清對創業大感興奮與期待，更曾為了生意，一段時間沒有好好睡過，近月Kenneth又送上另一個新驚喜，湛琪清說：「因為我都好貪靚，希望大家都可以有一個可以負擔到、好舒服嘅地方美容，令到人好有信心，Kenneth開呢度嘅時候問我個名叫Jessica Beauty好唔好（Jessica為湛琪清英文名），我真係以為佢講笑，佢叫我做代言人，佢真係用咗呢個名，我真係O嘴，係個好大驚喜，我唔係賣廣告，我真係靠呢度變靚同變瘦，喺結婚嗰日成為最靚。」她自言現時為兩個baby衝刺，先工作兼過二人世界，真正的BB遲一點才考慮。
每日享受新婚
湛琪清笑言對金太這個名字還未習慣，但卻享受新婚生活：「好鍾意呀，結婚係好開心，每日都有人同我分享，暫時兩個人都非常好，it's really wonderful！其實我哋兩家人好早已認識，我嘅家人好鍾意佢，佢嘅家人都好鍾意我，我哋兩邊都係好大嘅family，好warm，𠵱家要分配畀兩邊嘅屋企人，都好忙㗎，每個家人都好，我真係好lucky。」
兩個表姐汪詩詩、汪圓圓均嫁得好，汪詩詩為甄子丹太太，汪圓圓則嫁玩具大王兒子蔡加讚做闊太，婚姻家庭幸福美滿，湛琪清說：「我覺得呢啲係緣份，兩邊都非常之好。如果問我有冇諗過嫁入豪門，冇諗過喎，老公屋企人好好、好warm，兩邊都好尊重大家、好愛大家，係非常之好。」
童星惦念演戲
美國出生，湛琪清八歲已當童星，自始愛上演戲，七年前選擇來港發展，「我喺美國長大，喺八歲時有個電影casting，想搵一男一女嘅小朋友，唔知點解我會係1,700多個人裏面揀咗我，我好開心，因為三個星期唔使返學，不過之後要讀書為先，到高中我就去做一啲casting，好幸運被選中做一啲電視劇集、電影，嗰陣時表姐詩詩、圓圓就叫我去香港試吓，當時諗住畀一年時間自己，先做model學好中文，我話試一年，點知𠵱家已經八年！呢個係緣份，我有問我會唔會掛住美國，但我覺得香港係我嘅家，我好多愛人都喺度，Kenneth喺度、我屋企人都喺度。」
來港後湛琪清成為汪詩詩旗下藝人，現在已嫁人並開始做生意，問她還會「拋頭露面」繼續拍戲嗎？她笑說：「我仲好掛住演戲，我好細時就做，我同時都好鍾意做其他嘢，大學時我讀表演，另一邊有學商業經濟。其實有機會老公都會好支持我，就算有親熱戲，佢都話唔會擔心嘅，我鍾意做乜佢都支持。」
更多精采時尚內容，盡在 http://add.appledaily.com。
