馬時亨在4月6日請食飯，有份出席嘅大記者講Fit馬精神甚佳，談笑風生，對地鐵接連發生事故，處之泰然，總之去年10月做過手術之後，一切以不動氣為主，修養開始進入另一個境界了。
Fit馬感嘆香港昔年係爭氣之都，人人拼搏，總要走出一條路，但現在香港已變成「怨氣之都」，人人有一肚怨氣，怨者怨那，你鬧我，我鬧你，生產力自然降低。
馬主席高高在上，有佢嘅煩惱，整間港鐵公司，職員有不少怨氣，常在MTR Secrets發洩，直情係怨氣沖天，馬主席如能化解港鐵員工怨氣，跟住幫到林鄭月娥手，消解香港人怨氣，一定功德無量。
可惜呢，現時特區政府有意無意，在政治上係咁撥火，增加香港人怨氣，例如修訂逃犯條例一出，商界怨氣大增，傳媒文化界怨氣爆發，法律界（以大律師公會為代表）有怨氣，李家超局長都有怨氣呀，因為佢嘅前任葉劉淑儀推動法例立法，弄得天怒人怨，索性辭職走咗去史丹福，李家超分分鐘覺得自己好冤屈要孭鑊嘅啫。
移居咗香港，領有香港身份證之人亦有怨氣，北望樓經肖建華被送回內地一事，已不安全，再修訂「新逃犯條例」，內地人住在香港那裏也不安全。肖建華算係被強力部門強力引渡，林鄭李家超修例，就係將「肖建華案」合法化，唔使強力部門出手。內地人移民香港前，在大陸有冇留下痛腳呀？梗係有啦，睇幾時畀人郁而已！
在馬場碰到朋友與一啲內地人觀跑馬怡情，於是識咗其中一位男士，係有香港永久居民身份嘅斯文人，與一啲大聲講大聲笑之新移民明顯不同。請佢食叉燒包，佢耍手擰頭：「我係回教徒，唔食豬肉。」哦，唔食豬肉，原來唔係咁容易，只好食牛羊雞魚，叫咗一個上湯浸時菜，原本幾好，點知廚師順手放十幾條火腿絲在菜湯上吊味，呢位回教朋友即刻唔食。香港回教徒比較少，只知姓白，姓脫，姓哈之朋友，九成會係回教徒，姓馬嘅都有一部份，呢類朋友在香港享有宗教自由，在內地又點呢？呢位回教朋友聽左丁山一問，即刻望左望右，細細聲講：「有嘅，在鄧小平時代！阿爸話毛澤東要回教徒來養豬，令阿爺非常痛苦，阿爸在文革開始時只得四歲，逃過一劫，迎來鄧小平放寬宗教自由年代，我地一家回教徒開心咗二十幾年，但習主席掌權之後，或者因新疆問題，對回教徒監控好嚴，我好彩有關係來咗香港，但以後有起事上嚟，我地唔知會唔會被引渡？」哦，佢又係驚修訂逃犯條例，心有怨氣，又要諗辦法移居美加咯。