星期一參加校友飯局，見到中貿林與一位年輕人在座，以前未見過，以為佢係中貿林嘅中大mentee，順口問一句：「你係乜嘢書院㗎？」年輕人答：「我唔係中大㗎，係科大生物科技畢業生。」中貿林跟住解釋，呢位年輕賓架K由佢推薦，入到中大EMBA班嘅，算係半個mentee啦。讀中大EMBA？科大排名高中大好多噃，科大生點解唔讀科大EMBA？賓架K答得老實：「我畢業後到銀行工作八年，仍未儲夠錢讀科大，你知啦，科大EMBA學費高得驚人，我未算係成功人士，銀行唔會同我交學費，點讀得起，科大EMBA係畀CEO讀嘅啫！」未成功人士讀中大EMBA，呢個答案都幾新鮮，但其實切合中大辦EMBA之創辦原意。想當年，新鴻基證券馮景禧發動地產富豪鄭裕彤、李兆基、郭得勝等捐錢畀中大辦兼讀MBA及後來嘅EMBA課程，主要目的就係為本港公司企業培養中高層行政人員，並非為CEO錦上添花的，即係為年輕賓架K呢類人而設。兼讀（partime）MBA，早期嘅畢業生有周松崗、彭玉榮、蘇慶和等等，後來果然成為獨當一面人物，試問1981年嘅周松崗，在中環有邊幾個認識啫？
問中貿林去曼谷康民醫院驗身結果如何，佢話一切妥當，驗完身心愉快，心情輕鬆，埋單找數只係8600港元，更加輕鬆，在香港驗同樣「菜單」，起碼萬六七蚊啦！慳番啲錢，足夠幾日曼谷遊！正是人老習慣難改，佢由泰國通經濟師W師弟帶路，連日去睇曼谷樓盤，新舊都有，共二十幾個，見到一個二手樓盤，實用面積二千平方呎，折實賣港幣四百萬元，幾乎心郁郁即刻買下來，不過樓盤附近有不少新盤，更加靚，於是作罷。不過最正嘅盤，中貿林又唔捨得買，就係St. Regis酒店樓上，面對曼谷體育會馬場，三樓對面就是BTS車站，出入方便，可稱為曼谷市中心最佳位置樓盤，中貿林問吓價，話高層起碼三千萬港元，約萬幾蚊一呎。咁嘅豪宅，買來做乜好，如果淨係在假期過去住十日八日，好似幾奢侈噃。
不久後大賓架P上到嚟，見到年輕賓架K係中貿林半個mentee，於是贈佢幾句：「讀完EMBA應該對經濟金融管理各方面有認識，以後唔使讀財務管理呢類書嘞，面對今日中國市場，國企民企係必然銀行客戶，你首先要讀厚黑學，讀頭三個chapter就夠，然後讀三國演義、胡雪巖。唔係叫你用權謀去算人，而係裝備自己得好，就唔會中伏中招畀人呃，及在辦公室政治中求得生存！」之後賓架K猛咁點頭，似乎係孺子可教也。