因為暴動罪被判囚七年嘅盧建民（影攝食），早排特別請囚友畫咗張得意卡通公仔慰問卡，寄嚟《蘋果》託我哋轉交患罕見癌病嘅四歲童童。近日盧建民再寄信畀《蘋果日報》副社長陳沛敏，想知慰問卡係咪交到畀童童，佢喺信入面更透露，佢患癌病嘅爸爸近日病況轉壞，要入ICU接受化療，盧建民知道後好擔心爸爸病況，仲因為咁喊咗一場。
再寄卡慰問患癌菲傭
盧建民喺信入面講，最近朋友探佢時候通知佢，佢患癌病嘅爸爸3月中因病情轉壞，入咗ICU接受化療，𠵱家仲留喺醫院，盧建民知道後好擔心爸爸病情，喺監入面忍唔住喊咗一場，唔知點樣可以幫到勞碌半生嘅爸爸，又怕爸爸等唔到佢出獄團聚，八方明白盧建民擔心爸爸嘅心情，希望佢爸爸喺醫護人員治療下，可以早日康復，等盧建民可以同佢團聚。至於盧建民寄畀童童慰問卡，《蘋果》已轉交童爸手上，2月27日八方喺「隔牆有耳」寫過，童爸仲話已畀咗童童睇，認為畫得好靚，多謝大家對童童祝福。另外，盧建民之後亦有寄慰問卡畀《蘋果》早前報道過，因患癌而俾僱主即炒嘅菲傭Baby Jane Allas，《蘋果》記者亦已將慰問卡轉交Baby Jane Allas。
李八方