前特首梁振英似乎好寂寞，好想人關注佢嘅存在，之前689咬住社民連主席吳文遠喺《蘋果日報》頭版刊登全版廣告「問候梁振英」，入面標示嘅「香港人忍耐力有限公司」並不存在，或觸犯法律，噚日佢又喺facebook出文，聲稱有「朋友」參加文遠大將軍眾籌行動，叫文遠大將軍交出眾籌刊登廣告證據，否則就涉及詐騙。
網民：你的朋友就是你
但有網民懷疑，乜689仲有朋友？係張志剛定邵善波？作為689「朋友」，但又會夾錢賣廣告唱衰689，而689又唔怪佢，仲會為唱衰佢嘅「朋友」出頭，追文遠大將軍交刊登廣告證據，究竟呢個係咩「朋友」？
有網民質疑，呢個「朋友」係咪真係存在？定係689幻想出嚟？還是如網民名句「你的朋友就是你」，689參加眾籌唱衰自己，再扮有「朋友」參加向文遠大將軍追數？八方真係好亂呀！
而文遠大將軍於facebook隔空回應689，話如果689聲稱嘅「朋友」有響應眾籌，只能說佢呢位「朋友」都覺得689係政治閒人，非常關心佢嘅狀況。文遠大將軍仲挑機689，「你快啲自己報警，唔報正縮頭龜。」