中貿林在曼谷康民醫院驗身之後，盛讚醫院服務好，價錢平，醫生細心，同佢驗眼都用咗兩個鐘頭，跟住就例牌嘆息香港醫生唔係唔好，而係太忙，忙到根本冇時間向病人詳細分析病情也。泰國醫生掂，就因為在「國際醫院」內，大部份係「外援」，人手齊全，服務自然好。
泰國A嘅二千金在美國出世，在香港讀完小學後一同移民泰國，故此二千金有美國護照，香港身份證與泰國護照，讀完曼谷美國國際學校就到美國讀大學，本科四年讀完，話有興趣做醫生，泰國A供女讀書頂硬上，拿泰國薪水，支持女兒在美國讀書十年成為醫生，算佢本事。女兒畢業於Wake Forest大學醫學院（NBA球迷一定知道係馬刺球星Tim Duncan嘅母校，最近捲入名校收生醜聞，與史丹福、耶魯、UCLA同受調查），本來想返香港或泰國行醫嘅，但兩地都不准外地畢業生執業，二千金唯有留在紐約一間大醫院做醫生，跟住有美國仔狂追，結埋婚，現在安心住在紐約。美國大學培養嘅香港/泰國人才，卒之留在美國，此之謂brain drain，醫療保護主義之害也，他日累積經驗之後，會否回到曼谷之「國際醫院」服務，好難預測。返香港就一定唔會，費事再做過intern。
日前報載，一名36歲社工超喜食辣，吃過麻辣火鍋之後叫胃痛腰痛，到私家醫生診所求醫後回家休息，突告昏迷不治，不知真正死因為何，都幾得人驚。大記者睇到呢段新聞，醒起4月6日到荃灣地鐵站吃晚飯，主人家請客者就係港鐵主席馬時亨，見到「肥馬」好似清減咗，變成一個Fit馬，各傳媒賓客問肥馬如何減肥，原來有一段驚險故事。肥馬去年到澳洲放假遊埠，途中覺得有啲肚痛，又似係胃痛，初不以為意，以為休息吓就冇事，點知一量血壓，竟然上壓低到50，心跳達140，女婿立即話唔妥，送肥馬入醫院，檢查之下，搵到症狀係急性膽炎，如不及時治理，會一命嗚呼，於是醫生為佢做緊急手術，割除膽囊，休息幾日後，冇事！之後食物要減量，以清淡為主，即變相吃減肥菜單，於是好快就由肥馬變成Fit馬。馬兄讚賞澳洲醫生高明果斷之餘，亦生感慨，因為埋單找數，大約係一萬美元多啲，抵到極，如果在香港做同樣手術，要幾多錢？大記者後來問番左丁山，即刻有答案，因為老友醫生D個女產下孫女之後一年幾，腰部開始痛，原來生咗膽石，要割膽，咁就用咗30萬大元。香港私家醫院/醫生收費昂貴，賺到盆滿缽滿，仲係要拉閘排外，抗拒外來醫生在港執業，市民點可以唔追問林鄭點解咁縱容本地醫生？