特首林鄭月娥上月底出席由李嘉誠基金會捐款興建嘅慈山寺開光典禮時，竟然請主禮嘉賓誠哥食檸檬，喺對方邀請佢同中聯辦主任王志民握手時扮睇唔到，拒同王志民鏡頭前connect之餘，仲望吓手錶好似趕住走，惹嚟政界議論紛紛；雖然政府消息人士其後解釋，娥特到場後已同王志民握咗手，睇錶都係因為之後趕飛機，但政界花生友依然無限聯想。
事隔近兩星期，娥特同王志民噚日一齊出席河北省嘅機遇推介會，雖則兩人之瞬間隔住個河北省省長許勤，但要隔個身位握手都唔難嘅，結果娥特喺大合照後只係同企喺左、右兩邊嘅人握手，迅即急急走人，冇同行過身邊嘅王志民握手，唔知呢次又係有心，抑或無意？
身為前深圳市委書記嘅許勤，據聞同林鄭交情不淺，雖然今次許勤行程緊湊，但娥特噚晚都喺禮賓府宴請對方同河北省代表團。握握手做個好朋友，莫非林鄭只同「好朋友」握手，冇當王志民係老友？