【黑鏡線索】
之前寫過，自己公司改革時，其中一個重大轉變，係盡量用off the shelf solution，稱之為OTS。規矩係，無論係內部用嘅軟件如HR軟件、project management工具、CMS系統，至到畀用戶用嘅功能，例如登入、搜尋等等，總之有世界級OTS嘅，都優先租用，而唔係自己起。
好多人問，咁乜嘢需要自己起？其實好多時十樣嘢，有八九樣係必須，都又唔係間公司價值嘅重點所在。咁最理想，就係必須但唔關鍵嘅八九樣，都有世界級OTS租用，而剩低嗰一兩樣，就焗住自己做，專心做。另外就係要自己或搵人幫手將各個OTS串連起嚟。
OTS嘅好處有好多。最重要，第一，人哋專心做嘅，長遠嚟講，一定比起自己分心做嘅，好得多；第二，人哋一個題目服務上千上萬個客，喺呢個題目儲嘅經驗，自己內部開發一世都儲唔到；第三，其他上千上萬個客一齊分擔開發成本，間OTS賺到笑，收你嘅價，都係遠低於你自行開發；第四，你公司唔使分心做唔關鍵嘅事，撥返啲時間做關鍵嘅事，效果上嘅分別隨時以倍計。
咁着數，又唔見我哋一開始就咁做？又唔見個個都咁做？阻力喺邊度？
做得到 唔代表值得做
第一阻力位，往往喺編程部。編程同事，尤其係自問能力有返咁上下嘅，一般會覺得自己乜嘢軟件都寫得出。的確，好多真係寫得到，問題係，寫到係咪就等於值得自己寫？呢個係好普遍嘅盲點。你明明覺得唔值得公司自己寫，你同編程同事講，佢可能覺得你質疑佢嘅能力，點解要用出面嘅嘢。
再者，就算用OTS，編程同事好大機會都要幫手做接駁，即係要睇說明書去理解人哋嘅系統，而大部份人，都寧願自己由頭諗過，都唔想去睇人哋本說明書，於是本能地抗拒用出面嘅軟件。
第二類阻力，新開嘅公司少啲發生，喺做咗一段時間嘅公司說好常見。假設一間公司，過去十年，個HR系統，都係用自己開發嗰個。即係話，好大機會，咁多年嚟，都係HR部同事有啲乜嘢需要，就直接走去搵IT部提出要求，然後輪隊。呢類情況，通常IT部唔會大力質疑啲要求，因為HR話要，你憑乜話佢唔要？
揀軟件 順手檢視workflow
換個角度，個HR系統係個表象，裏面嘅，其實係間公司HR嘅workflow。咁你話轉用OTS，好多時OTS唔會好似內部開發咁你想要乜就有乜，即係話個OTS支援嘅workflow，同你個workflow唔同。咁有兩個選擇，第一個係大部份人嘅本能反應：既然唔百分百支援我哋個workflow，咁咪唔好用佢囉！
第二個選擇，係問，其實世界上有上千上萬間公司都用緊呢個OTS，會唔會其實我哋自己個workflow有問題呢？點解我哋HR嘅需求會咁獨特呢？係好嘅獨特，定係壞嘅獨特呢？
再諗深一層，而家個workflow，當初係幾認真思考過嘅呢？其實，揀OTS，好多時唔係揀個軟件，而係揀適合自己嘅best practice，係重新檢視部門workflow嘅一個過程。當一間公司，咁大阻力，都轉到用OTS，就係一個徵兆，之後有好大嘅進步可能。
撰文：宋漢生