【體育人訪】在這個甚麼也講求速度及效率的世代，帶領港隊U22衞冕省港盃的郭嘉諾（Kenneth）認為，足球要講理念與堅持，感覺像背道而馳。
未經過職業足球洗禮的郭嘉諾，是近年少數受足總高層點名重點栽培的本地教練，這位持有城大英文系及港大運動科學雙學位的少帥，因父親離世，燃起其來自足球世家的熱血，毅然跳出舒適圈，追尋足球夢。
為生計，試過1天教5課，現身兼兩職，幾乎每天早出晚歸，穿梭將軍澳、天水圍及何文田足總，犧牲陪伴太太及一對年幼女兒的時間，他說：「從事足球行業似乞食，要睇香港有冇善長願意贊助職業球隊、搞足球學校，教練先可以搵食。」
記者：曾雁平 攝影：周智堅
郭嘉諾的教練路帶點戲劇性，來自足球世家，伯父郭有及郭石（已故）是南華球員，父親郭錦洪（已故）是中華民國與南華一代左後衞，贏過亞運足球金牌，又入選過亞洲明星隊，母親是前網球員，未知是否因家族吃過運動員之苦，所以家人並不鼓勵郭嘉諾發展體育事業。
遺傳父母的運動基因，郭自小網球與足球雙線發展，曾是香港青年網球代表，14、5歲決定專注有一班隊友的足球，還考入愉園青年軍，代表過香港學界代表隊出戰國際賽。考入城大時，碰上港甲踏入冰河時期，決定專注學業，暫放下職業足球夢。Kenneth大學出戰大專賽事時，獲現效力凱景的黃耀富推薦到乙組港會試腳，結果順利加盟，還開始在港會任職足球發展經理，邊踢業餘足球，邊以學生運動員身份考入港大運動科學系，並開始任港會青年軍教練，10/11球季隨港會升上港甲，以業餘身份挑戰職業隊。
父親離世 決跳出舒適圈
「喺港會任職，有機會做足球工作，好滿足，如果唔離開應該可以喺港會做一世。」郭在港會除負責足球部門的行政工作，亦有機會擔任教練，試過帶領港會青年軍捧香港曼聯盃，更重要是認識前港隊主教練金判坤。「金判坤當年曾帶大仔到港會青年隊試腳，後來未有繼續，但金sir都專程嚟觀操，後來先知佢想睇我教波，佢覺得我有潛質，邀請我入足總教青年軍，就咁展開喺港隊兼職教練工作。」
真正令郭嘉諾決心向自己喜歡的工作發展，是2011年父親離世，他說：「當時喺港會做咗七年，父親離世對我影響好大，嗰一刻開始諗，到底人一世營營役役為乜呢？自己嚮往做教練，爸爸係足球員，伯父郭石同郭有都係足球員，姓郭一家，喺足球上有好多歷史，以往冇諗過因為咁而做全職教練，但嗰刻自己想做，就決定向呢方面發展。」他甚至先辭職再部署怎樣走這條教練路。
縱有雙學位學歷，但選擇當全職教練，家人並不支持，他說：「初初辭職話想全職教波，媽咪、太太同外家都有意見，因為當時要供樓，結婚冇耐，準備有小朋友。從事足球行業似乞食，要睇香港有冇善長願意贊助職業球隊、搞足球學校，教練先可以搵食，但既然決定咗就以行動說服佢哋，到今屆帶隊蟬聯省港盃，算係有啲成就，球迷認同，媽咪同太太開始認同同接受轉全職教練嘅決定。」
早出晚歸 細女一抱就喊
轉任全職教練初期，郭嘉諾為生計試過由早教到晚，1天教5課全沒休息，家人難免有怨言。「教波要講理念，但好難堅持，同家人講理念，冇實質成績，好易動搖。如果話教波冇影響同太太嘅關係就肯定呃人。太太喺港大讀書嗰陣認識，佢係港大籃球隊，打過甲一，運動員出身，明白教練要放時間喺球隊，但以媽媽角色嚟睇，實在需要老公多啲喺屋企，佢教書，暑假有較多假期，想喺暑假去旅行，但暑期係教練最忙嘅日子，結果計劃多年嘅全家旅行仲未成行。」郭談到與太太的關係時充滿歉意。
去年在不被看好下，郭sir領軍重奪失落四屆省港盃的冠軍，之後足總委任郭嘉諾領軍戰亞運，完成連續三屆打入淘汰賽的任務，足總高層大為讚賞，容許郭以足總教練身份兼任港超佳聯元朗教練，為的是造就這位能操流利英語的教練可從執教球會吸取更多經驗，更難得是足總高層接納其建議，以U22球員為主力爭取衞冕省港盃。結果港隊再一次被看淡下，次回合紀錄性大勝廣東4:0，成功衞冕。今年三月郭開始修讀亞洲足協職業教練文憑，獲得更多進修機會同時，變相犧牲與家人的相處時間。
郭的大女兒五歲，小女兒一歲，每天早上起來，與太太帶大女兒上學，之後駕車由將軍澳到天水圍或屯門教佳聯元朗，有3、4天要返回足總辦公室處理行政，每星期有2、3天要教青年隊，周六、日多有港超賽事，沒有賽事也要到現場備戰，每星期可能只得1、2天在家，還未計要帶隊出外比賽及集訓。他說：「每日返屋企佢哋多數瞓咗，因成日帶隊外出，大女近來唔再問我去邊，細女試過見得太少而唔認得我，一抱就喊，確實要努力啲補救。有時真係唔知點平衡，係絕對困擾，但決定犧牲咁多想行這條路，希望第時可以專注一個教職，到時可有多啲時間陪家人。」
熱血少帥 師承Kim sir
師承金判坤的郭嘉諾，向球員的說話充滿激勵性與感染力，年初港小將次回合大勝廣東後，球員異口同聲指，教練賽前不斷的激勵，令球員上場更有信心，是能夠擊退強敵的關鍵。郭指熱血風格源於在大學時期，比賽不多，每場比賽上場便要拼盡，因為要做到無悔，方式與前港隊教練加利韋特教法接近。「港隊比賽經驗唔多，個人能力未必太強，咁就更加要靠整體同心理，所以將大學時住宿舍嘅熱血搬到所帶嘅隊伍身上，省港盃過程不斷向球員灌輸搏盡無悔嘅理念。」
職業足球從來成績代表一切，但郭卻堅持容許年輕球員犯錯，讓他們從錯誤中成長，不會因犯錯而放棄，故他不會理會外界怎樣看，還是簽入紀律差到沒球會接收的卓耀國，他說：「我係青訓教練出身，需要相信重用年輕球員嘅理念，唔會因為贏波行先而改變，今次省港盃係好好證明，當然唔係每次都可以好似今年咁好彩，但堅守理念係有回報，包括得到球員、家長同球迷嘅尊重及信任，呢一點好重要。」
重視青訓 目標港足教頭
他承認教練生涯受金判坤影響，並讚金事事親力親為，每次落敗也花很多時間反省反思，還會覺得對不起香港人而不敢外出，郭亦決心要當一位肯承擔的教練；另一位影響他是已離開足總的前菁英發展教練足達勇輔，他說：「足達勇輔係好有遠見嘅教練，佢認為足球係講堅持同耐性，仲強調要輪流畀球員正選，因為球員只有正選上陣先最真實，舊年佢帶領港隊出戰港澳埠際賽，安排一直踢前鋒嘅孫銘謙串演左閘，目的係畀佢清楚知道點去支援前鋒，同前鋒要點走位去配合隊友，呢啲經驗對孫銘謙將來復任中鋒有好大幫助，呢個諗法同自己以往所學好唔同，而日本攞亞洲U23冠軍，全隊23名球員都踢過正選，真正做到成績同青訓發展兩方面。」問到郭嘉諾有否想成為大港腳主帥時，他毫不掩飾：「港足主教練係目標，但唔係𠵱家，將來有機會出任港隊主教練，入籍兵將係輔助角色，重點係本地球員。」