老總L講過親人患上急性骨質流失，幸好撞到醫生C，醫生判定正確，及早醫好一個由甲狀腺病催生荷爾蒙異變而出現嘅骨質疏鬆症；香港係有不少好醫生嘅，係世界一流水平，只可惜醫生人數少，醫生/人口比例太低，加上香港人口老化，人老就易生病，於是搞成今天香港人不要老，不要病嘅醫院難民營狀況，全港嗌死，而醫委會有自私委員投票反對放寬海外醫生考試及格後免除實習嘅規矩，呢啲委員唔知有冇良心嘅呢？在醫務所常見「仁心仁術」呢四個字，某些阻住地球轉，阻止海外醫生來港在公立醫院行醫嘅醫生，可否贈之「盲心盲術」四個大字？
同老總L講醫生，愈講愈㷫，好在Sabatini之Tasting Menu有好多好嘢，譬如一味「牛肉清湯伴野菌，牛仔舌配黑松露菌」夠晒鮮味，飲之精神一振，學老總L話齋，人生苦短，隨時可能遇上一個怪病難醫，遇上美食就不妨盡情享受。蔡瀾好鍾意嘅帝苑酒店「東來順」，獲得Forbes四粒星獎，「四季菊」日本餐廳（IFC及帝苑酒店）獲推介獎，可惜左丁山唔食得辣，對「東來順」只能望門興嘆，去IFC四季菊就好方便，不過訂位就唔係咁容易。
吃完之後，坐地鐵返回中環，擺低一啲嘢又走去灣仔開投資會議，退休賓架W話：「開會唔好咁長，得唔得？四點九要開枱打麻將。」又講得幾老實喎，退休後空閒時間多，打麻將無妨，賓架W話：「好難約齊人㗎，約好耐先至有一場牌打，幾十歲人唔打麻將，好怕有老人痴呆。」其實開會亦冇乜好講，焦點係恒指升上去三萬點係時候止賺吖，還是追入？賓架W話股市走勢好，睇唔到有大跌機會，不妨細注買入強勢股。證券K話無異議，財務A話吾從眾，於是好快散會，賓架W施施然行去逸東軒開枱。我地問財務A豪宅曾被爆竊，有何損失？佢話保險箱被撬去，損失慘重，只係從警察方面收回幾塊金牌，點解攞得返呢？原來盜賊乃南美幫，其中一名之後在會展珠寶展做文雀，失手被捕，警察從佢身上搜到幾塊金牌，金牌上刻有財務A的名字，仲唔證據確鑿？但搜到嘅現金冇識認，暫難取回，疑犯身上又有一張滙款單，有巨款滙咗去南美國家！林鄭月娥成日話香港治安好，但爆竊淺水灣，山頂，清水灣，飛鵝山，九肚山之匪徒來自五湖四海，已令豪宅居民心驚驚。證券K話最近已在家中安裝先進安全監控儀器，所費不菲，但希望可以保住家宅平安啦！