未到復活節假期，有清明節長周末，大量香港人已經急不及待，湧往泰國、日本放假。近年觀察所得，年輕人一有空就去日本，中老年人先至會去泰國，好似肥仔K一個中學同學，上星期三夜晚收工後已經去機場前往日本，可以去得咁輕鬆嘅？呢呢，做白領就冇咁易告假啫，呢位同學K當年冇入大學，會考後就去建築地盤，依家已是師傅級，放低工作，就可以去日本旅行，一年去幾次㖭。反而佢啲同學入咗大學，現在成為工程師、會計師、測量師、律師，但工作反而冇師傅K咁自由，地盤轉工話咁易，總判、大判、二判邊度敢炒佢魷魚，你估係傳媒工作者乎。
沙田陳太個孫女今年讀K3，九月升讀小學，阿媽緊張到不得了，驚住學校派位派唔到首選，但小女孩活潑好玩，聰明伶俐到極，邊會知道大人心中驚慌吖，呢日佢問：「點解會有十幾日放假唔駛返學？」陳太解釋：「復活節假期吖嘛。」孫女為之雀躍，大聲講：「有咁多日假期，去泰國咯，我好鍾意泰國！」陳太為之愕然，回心一想，估計係孫女去年聖誕往泰國，大概係日日玩得好高興，心中記到實之故，可惜唔係話去就去得，佢父母返工好唔得閒也。
中貿梁就唔同，根本日日唔駛做嘢，可以到處雲遊，上星期忽然接到佢嘅短訊：「同你師弟W嚟咗曼谷驗身，認真價廉物美！」師弟W喺新亞讀經濟，步左丁山後塵，拿洛克菲勒獎學金入咗曼谷法政大學讀經濟學碩士，回港後做經濟師，幾年前從金管局退休，逍遙自在，與中貿林呢位閒人一齊去曼谷，一拍即合。中貿林話要驗身，師弟W咪帶佢去陳有慶家族擁有嘅Bumrungrad International Hospital（康民國際醫院）做詳細檢查。呢間醫院每年起碼有十萬個外國人在此驗身，十五年來生意興隆，左丁山嘅一手經驗係夠快、夠妥，夠平！醫院內醫生護士人數之多，香港私家醫院難以比較，大部份醫生講美國口音英文，小部份係泰國大學醫學院畢業嘅醫生，左丁山受皮膚敏感之苦十幾年，2005年到該醫院驗身及睇完皮膚科後，至今已無痕癢之苦，可吃少量蝦蟹。
左丁山以前住在泰國人分租房屋，屋主女兒當年讀中四，今日已是曼谷最著名公立醫院之部門主管高級醫生兼榮譽臨床教授，佢話泰國保護本地醫科生，不准外國醫生開醫務所，但可以在「國際醫院」行醫，曼谷要做東南亞Medical hub，國際醫院應運而生，不少美國大學醫生（其中有不少泰國人）可以到曼谷就業，於是營造咗三贏局面，即是旅遊業、泰國病人及泰國醫生皆是贏家，何解？國際醫院吸引大量驗身／醫病遊客，中東人佔領康民；泰國富裕階層可向國際醫院治療，普羅市民入公院可收分流之效；國際醫院有先進儀器設備，加上外來醫生刺激泰國整體醫療進步，還有泰國資深醫生可到國際醫院兼職呢！