銀行界最有名、人人識嘅大公關張樹槐（新亞新聞79）今年自恒生銀行退休，轉任CEO高級顧問，以兼職方式為恒生服務，既然係兼職，唔駛日日上班，即係話（一）有時間為任何CEO做公關策略顧問，（二）有更多時間周圍飛，到處跑馬拉松，以後開心輕鬆到極。
張師弟因馬拉松而認識家庭醫生許君恕，呢日傳來一張照片，係許醫生賀佢榮休，請佢食牛扒飲靚酒（95分）嘅碰杯照。哎吔，點解唔叫埋左丁山去？自己認識許醫生37年，可說歷史悠久，佢由沙田第一城診所做起（1981年左右），進駐中建大廈，最近又知道佢會在尖沙嘴開第三間醫務所，真係值得再來一次食牛扒飲靚酒慶祝一番也。許醫生平時愛跑馬拉松，60歲大壽時露一手表演夾Band，技驚四座，當晚佢展出一張幾十年前嘅打Band劇照，樣子似係皮里士利加保羅安卡混合體，肯定曾令不少女孩子尖叫。
張師弟與許醫生食靚牛扒，左丁山亦「有食神」。上星期與老總L等到帝苑酒店Sabatini試食一個Tasting Menu。每次中午到尖東，總覺得人流稀少，好淡靜，同尖西嘅人車爭路情況差好遠，不過入到Sabatini，咦，又唔曳噃，有近八成上座率，一啲枱仲係三代同枱㖭，可能係呢間有38年歷史嘅意大利菜餐廳有一班舊客熟客捧場啩。坐低之後，就醒起蔡瀾不久前有一篇詳細介紹到帝苑吃喝嘅餐廳，間間讚好，咁我地吃乜呢？餐廳既然有Chef Claudio Forbes Tasting Menu（慶祝獲得福布斯雜誌推介餐廳銜），一於吃之哉，主菜「烤西班牙羊扒」肉嫩味鮮，無怪係餐廳皇牌，其他菜式亦非常好，值得張樹槐與許醫生來一試。
老總L係美食專家，吃勻意大利，即將放假去西西里吃海鮮，嗰鋪得意樣子，羨慕死左丁山。老總L忽生感慨：「人生可能苦短，有得食怕乜盡情享受！」跟住講古仔，原來親人十幾年前忽然失重，一個月瘦咗十幾磅，跟住左腰痛，於是去睇骨科專家，專家話係腰骨痛，食一輪藥應該冇事。點知一痛再痛，再瘦十磅，老總L於是搵人介紹另外一位醫生，就係醫生C（咁啱就係左丁山老友），醫生C檢視痛狀之後，首先叫親人驗血，驗甲狀腺，然後再照腎；檢驗報告出嚟嘞，證實咗醫生C初步觀察，就係骨質疏鬆，骨質流失，將快患上玻璃骨症，一跌親就好容易殘廢。點醫，首先搵專家施手術治理甲狀腺令賀爾蒙恢復正常，然後第二位專家開刀取出腎石，醫生C全程監控，治療骨質疏鬆，幾個月後恢復正常，再無腰痛，老總L話：「若非遇上醫生C，診斷正確，親人可能已遇大難，直情當佢係再世華陀，感恩不盡！經此一役，我更加珍惜食得是福。」