趣趣地：屈福特反勝狼隊入決賽

星期日英足盃上演另一場四強賽事，狼隊同屈福特正面交鋒。今仗狼隊續以魯爾占美尼斯同迪亞高祖達攻堅；相反屈福特就以安達格雷取代迪路菲奧，夥拍迪尼。上半場36分鐘，狼隊一次左路角球由馬特杜靴迪破網，幫球隊領先1:0。換邊再戰，狼隊依然佔上風，結果喺63分鐘再有斬穫，占美尼斯突破越位陷阱破網，入球後佢仲戴起墨西哥嘅摔角面具慶祝。

諗住狼隊入硬決賽，但屈福特換入迪路菲奧後，比賽開始轉風向。79分鐘，屈福特一次手榴彈攻勢，狼隊解圍不遠，迪路菲奧一個笠射收死狼隊門將魯迪追成1:2。之後喺補時階段，迪尼主射12碼中鵠，幫屈福特追成2:2入加時。加時嘅屈福特氣勢更盛，結果喺加時上半場尾段，迪路菲奧再建功領球隊反先，結果屈福特以3:2神奇反勝狼隊，將喺5月18日同曼城再喺溫布萊爭奪足總盃冠軍。