做老師慘過做……洗碗？最低工資四十幾元？食懵你啦！多謝晒啲議員，冇八十蚊一個鐘請工人，你諗都唔好諗。求神拜佛祈求成功追討最低工資、最低工時班議員，唔使等投胎，就今世，做一次老闆而唔係按月攞納稅人嘅血汗錢；尤其飲食行業，睇吓你地點死法。洗碗工人一個鐘肯收八十蚊，而你又長期請到人，真係好運。不少洗碗工人上午9點返工、中午食午飯人客擠擁時間隨時炒老闆魷魚即走；又或頭暈身㷫，霎時告假。總而言之，洗碗工人乜都唔使理不單止，至重要，老闆莫說責罵，聲大一點講話都唔敢。你有冇見過洗碗工人因老闆痛罵之後跳樓自殺？一般情況，做三個月辭工去遊埠，你有冇見過洗碗工人交過稅呀？自殺、報稅、極長工時、俾老闆奚落惡罵……全皆老師份內事，與洗碗無關！
做老師慘過……做雞？今時唔同往日，起碼香港，老早笑貧不笑娼。有聽過出鐘服務期間被過份肉緊嫖客箍頸勒死，俾哥仔呃晒皮肉辛苦錢一時想唔開食藥High死，但冇乜聽過俾嫖客鬧完自殺死。做雞時間自由，一般情況，每次交易面對不過一個嫖客，反正賣身又非賣心、更加唔賣Kiss，閉上眼當俾鬼壓，完事收錢下一位。每日六時起床，七時上班，八時前上堂，直至黃昏七時未必可下班。上堂面對幾十個學生，好運教Band 1 名校，如果運滯教Band 3，都好暈；仲係日日暈、時時暈，遇上要求不合情理校長，放長假期間回校開會，週日放假一樣回校開會。同事勾心鬥角好平常，遇上個發癲校長睇你唔順眼，唔好話日日，就一星期三日被鬧至狗血淋頭，那種精神壓力生不如死；信唔信由你，做雞就肯定冇呢種壓力。
做老師慘過做……食蕉？保安、Security、守門口；無論你如何稱呼，一般情況無需與人溝通，上班如過小日子，幾可有機會發生搶劫殺人？不少Secu阿伯靚姐與住客保持距離，平素禮尚往來打個招呼，往還數十年平淡如水，點似得做老師勞心勞力勞肺浮生裏奔波。
做老師慘過做……何秀萍？你識何秀萍個可？唔識唔緊要，我話俾個你知；何小姐曾經正職商台做接線生（係，舊時大機構有個工種叫「接線生」，）副業搞創作。我們並不熟絡，然而某次與好幾個人同坐同一空間，記得她說：做接線生至好，不用料理人事糾紛，朝九晚五準時放工準時出糧，幾時見過老闆召個接線生入房照肺啫？無需搬搬抬抬，無需開會，同事請食蛋糕永遠有自己一份，貪過癮更可訓練鸚鵡一樣培訓自己不同喉音。浮生若閒，大智慧。做老師與何秀萍比？唉、人比人比死人！