早排社民連主席吳文遠喺網上發起「問候梁振英」登廣告行動，眾籌空前成功，大家今日已經可以喺《蘋果》頭版睇到呢個深切問候689，支持「努力D」取代埋習總做國家主席嘅廣告，通常電影拍完例必有製作花絮同彩蛋，今次呢個問候689廣告，亦都有呢兩樣嘢可以同讀者講吓。
吳文遠籲po上網加hashtag
呢個廣告由眾籌到印埋出嚟只係幾日時間，但背後要處理嘅問題真係唔少。文遠大將軍同八方講，呢個廣告嘅設計理念，就係好多香港人見到689近日經常喺facebook報告自己喺《蘋果》睇到乜嘢廣告後，都好想透過廣告問候689，不過文遠大將軍一路講一路笑住話，如果將全部香港人問候689嘅原話都刊登出嚟，呢個廣告應該未必出到街！而且亦要防止689出律師信，所以佢用反諷方式曲線表達，當中唔少概念，都嚟自網民留言，如果照字面睇，689睇到個廣告應該好高興，但佢相信香港人好聰明，會睇得明，不過以689智慧，唔知佢睇唔睇得出係曲線？
至於呢個廣告又有乜彩蛋？《蘋果》每日會喺A1左下角刊出當日報紙印數，今日買咗《蘋果》嘅讀者，可以搵個印數睇睇，就知個彩蛋係乜。
文遠大將軍希望，呢個廣告能令689血壓升高，又呼籲今日買完報紙嘅朋友，影相打卡放上網加「#問候梁振英」，實行全天候洗版，令689避無可避，各位亦可用QR code到fb網上版本留言，盡情問候689，不過大將軍話今次登廣告計劃雖然唔算係乜嘢抗爭行動，但都叫製造個機會畀香港人出一口氣，不過對住689呢個不斷刷存在感嘅政治閒人，其實毋須太費神，應該團結放更多精力去對抗林鄭政府所做嘅壞事，好似《逃犯條例》修訂、律政司放生689，同埋東大嶼人工島等議題，希望市民同樣團結打呢啲議題。
李八方