51歲凍齡劉太郭藹明向來低調，日前難得接受訪問。郭藹明，這個能讓劉青雲返回地球的萬能太太，本身非常獨立自主，除下廚煮飯，更會騎馬跳欄、走花步，愛看《復仇者聯盟》（Avengers），但堅持不開Ig、不玩facebook。溫柔卻有個性。她在二十一年婚姻生活中，學識互相磨合，然後與老公一齊變老。
採訪：林妙萍
攝影：周樂恒
「每次當我揸住太空船，飛到宇宙唔知邊度，你總有辦法令我安全返回地球。」「太太係我人生最好嘅禮物。」劉青雲曾經公開冧太太郭藹明的甜蜜宣言不少。
騎術好手
郭藹明和青雲是圈中模範恩愛夫妻，男主外女主內，除了撐老公場，郭藹明甚少出席公開活動，日前以代言人身份出席活動，難得現身兼分享低調私生活。「前一晚我狂敷面膜，其實我係偏夜瞓嘅，一點幾先瞓，我老公成日叫我一點前瞓，佢早瞓，成日瞓美容覺。」1991年香港小姐冠軍、雙碩士畢業，多年來樣貌、身形完全凍齡，眼中只有柯德莉夏萍（Audrey Hepburn）才是真女神，「我冇乜特別秘訣，都係老生常談，例如你要保持心情開朗啦，同埋年紀開始大，運動好重要，都要食得健康。」
先講做運動，瑜伽拉筋做weight training之外，原來郭藹明是騎術好手，「以前我有跳欄，係好好玩，𠵱家細膽咗，冇再跳，就會做簡單嘅花步，當然唔係比賽級數，但都好難，因為每個節奏都好細緻。當你騎上隻馬，嗰種人馬合一嘅自由、奔放，同隻馬一齊去跑嘅心情，個人係放得好開，好開心。」煮飯要吃得健康，中西日韓菜也會煮，剛過去的周末就煮了杞子雲耳蒸雞。食玩瞓，除了騎馬，郭藹明也愛看英雄片。「《復仇者聯盟》，我睇晒成個系列，最近睇咗《Marvel隊長》（Captain Marvel），其實我好鍾意睇英雄片、科幻片，同埋《Marvel隊長》係英雄片中，少數女人做主角。」
一齊變老
郭藹明拍《狀王宋世傑》、《足秤老婆八両夫》都是十多年前的事，拍劇復出要講時地人，動力未大到她要放在首位，提議她玩玩現時流行的網紅KOL，卻原來她連各大社交平台的賬戶都沒開。「冇㗎，我全冇㗎，因為我覺得係網絡安全問題，同埋私隱嘅問題，我係希望share with朋友。」
為婚姻保鮮不易，即將結婚二十一年，郭藹明覺得最大轉變是要在婚姻中，學懂妥協、互相遷就。「你一個人單身時，好多嘢係跟自己方向去行，但結咗婚，兩個人一齊生活，始終要學識遷就，要搵返大家底線，互相磨合。老公眼中的她，固執向前衝；她眼中的老公，對許多事有高要求，「你就吓我，我就吓你咁，咁先可以相處得嚟，再慢慢一齊變老。」
【高跟鞋情意】
郭藹明髮型、身材、樣子多年不變，時尚之路，她直認是懶人，平日打扮casual，「少啲衫，唔使管理。風格我都好簡單，唔想披搭太多嘢喺身上，even顏色，買嚟買去都係呢啲顏色，黑色、白色、灰色，偶然會鍾意黃色，你會發覺，原來我係咁嘅人。」
女人總愛shopping，中伏位和你我一樣：高跟鞋！「你唔會着對高跟鞋去街市，變咗買完返去，好似藝術品咁放喺度，得閒就拎出嚟摸吓、睇吓，但就唔多着。」
更多精采時尚內容，盡在 http://add.appledaily.com。