N年前去過佐敦道彌敦道交界嘅嘉賓大廈（即裕華國貨樓上）睇眼醫，等餐懵。呢間大廈直情係九龍名醫中心，成間醫院模樣，除醫生診所外，各種檢驗所齊全，對病人非常方便。當然，最吸引人潮，就係嘉賓大廈內啲醫生夠名牌，有口碑，而且收費要比中環相對便宜。
當年去嘉賓大廈睇病已經夠辛苦，現在，有埋自由行病人大量湧到，情況更擠擁。4月5日睇曾智華專欄寫「嘉賓大廈慘況」：嚇死人，原來大廈立案法團貼出「哀鳴通告」，懇求病人排隊時不可阻礙他人，孩子不可四處走，廁所內不要吸煙，吐痰要吐在紙巾上，再放在垃圾桶，排隊時不要蹲、踎、卧、喧嘩……
有上述情況出現，反映（一）到大廈睇病病人太多，（二）病人之中有好多自由行/醫療漫遊客。
香港醫療系統全面失陷，公立醫院似難民營，病人入院內全面失去尊嚴，已是常識。私立醫院方面，幾乎間間滿到瀉，養和醫院如果可以上市，必定凍資千億元起碼；私家醫生呢？做到手軟啦，最威風者係星球人，無名氣者亦豐衣足食，一生不驚炒魷，勝過讀甚麼Global Business嘅考試精英。一句講晒，醫生在香港係做得辛苦，但以收入而論，會係香港最top 1%。
既然係咁，醫務委員會仲否決海外醫生寬免實習要求（以有限度註冊於醫管局，衞生署或兩間醫學院服務，於三年內考獲執業試資格可免實習）（15票反對，14票贊成），實在太令市民憤怒，認為投反對票嘅醫生真係無良兼自私，對唔住香港人！究竟投反對票者有乜理由落閘排外呢？不少海外醫生係香港人子弟，在外國係有經驗醫生，在醫院服務三年，考香港醫生試及格，還要侮辱佢地，要佢地再做intern？呢班反對分子以為自己係上帝，豈可如此傲慢蠻橫，拒人於千里之外？為咗自己荷包利益，唔算係錯，但香港好多醫生已經肥到綁唔到鞋帶，唔駛再保護啦。唔通有醫生認為中大港大醫學院畢業生叻過全世界？Come on，照吓鏡先，你地以前讀書成績係高，但撫心自問，真係叻得過哈佛、牛劍嘅醫科生或新加坡國立大學醫科生？當公立醫院醫生做到得閒死唔得閒病，當嘉賓大廈淪陷之時，救急方法就係免考試輸入海外醫生，醫委會既然有人冥頑不靈，市民應該要求政府全面改組醫委會，增加非醫生委員。林鄭月娥藐視商界，聲言絕不收回「逃犯條例」修訂案，但面對醫生界，從來是軟腳蟹，枉稱「好打得」。