皇家馬德里教練施丹（小圖）形容車路士夏薩特非常出色，又講自己喺呢名比利時國腳年輕時候，已留意夏神嘅球員生涯。自施丹回巢教皇馬後，佢一直高調講正效力其他球隊嘅球星，包括巴黎聖日耳門雙星基利安麥巴比同尼馬，仲有曼聯中場保羅普巴。喺上周五記者會，施丹被問到皇馬係咪應該嘗試羅致夏薩特時，佢話：「我唔可以畀意見，但我一直高度評價夏薩特，我睇佢好多比賽，佢踢法甲時，我已認識佢。」夏薩特係出色嘅球員，但我可以講嘅係咁多。
另外，曼聯中場保羅普巴表現漸入佳境，更有傳已成皇家馬德里獵物。普巴合約到2021年先屆滿，但為咗留人，紅魔決定同普巴傾續約，據報普巴目前大概30萬鎊（約307萬港元）周薪，佢要求加薪至50萬鎊，同阿歷斯山齊士睇齊。