左丁山近年見到啲世姪世姪女報考大學，總係勸佢地唔好讀新聞系，世姪或者會信吓，世姪女多數唔理解，係要報讀新聞系，人各有志，梗係由得佢地啦，一啲老友聽完左丁山如此如此對佢地個女講，總會問點解，答案好簡單啫，全世界皆是如此，傳媒係夕陽工業，入行冇前途，睇唔到前景，做嚟做乜，去做物業管理好過啦。物業管理公司CEO係馬迷，夠心水清，在馬場對左丁山講過：「你睇吓啦，報紙愈來愈少，免費電視愈來愈冇人睇，有線電視蝕到入肉，報紙冇邊幾間賺錢，一路走下坡。我地呢，香港新樓不斷增加，每個屋苑，屋邨都需要物業管理，公屋廉租屋亦不斷增加，需要人去管理，機械人代替唔到，正是前景無限，你記住呀，你識得啲年輕人，無論讀乜科，都歡迎佢地入物業管理呢行。」
物業管理人工高唔高，確係冇乜考究，不過淨係睇表面，畢業生入行考到個牌之後，份工怕會幾穩陣，唔似得新入行記者，人工低，機會少，又隨時被裁員。
搵工最緊要講興趣，亦要講人工及前景。一啲大公司唔裁員，薪酬穩定，但係唔知點解，內部管理令員工不滿，有乜蝦碌嘢，一定第一時間見報，顯然就係員工向報紙爆料。上一個周末在沙田馬場見到世姪F同一位朋友，佢地話平日做得辛苦，特登入場睇跑馬，小注怡情，減吓工作壓力喎。問世姪F個朋友有乜壓力，佢竟然話：「我好憎間公司，但又唔走得，因為薪水算OK，而且已經做咗十幾年，出面風大雨大，轉工無謂啦，所以憎公司都留喺度。」點解會憎呢？佢講嘅原因，其實幾濕碎，不過加加埋埋，怨憤不斷累積，就好唔高興囉，例如不滿意上司編更（成日針對我），不滿上司擺款，不滿工作量太大（因為乘客多到難以應付，又唔夠人幫手），不滿意被派去新站竟然冇休息室，吃飯需要去冷巷走廊，不滿意CEO人工高過佢地近40倍……左丁山對呢位朋友仔講：「間間公司都有呢類嘢嘅啦，你何必憎公司呢？」佢答：「唔止我一個呀，個個同事都憎，如果你睇到我地公司secrets你就知道有幾多員工怨氣，大家在群組放相片，好快就有人轉發畀蘋果日報，驚死公司出事冇人知咁！我自己冇試過向蘋果爆料㗎！」可能有代溝咯，左丁山一代，年輕時打工，唔高興上司或中層管理，最多轉工或是忍忍忍，但唔會向報紙唱自己間公司嘅，而呢一代年輕人喜惡分明，乜都夠膽爆，搞壞公司形象好似唔關佢地事！大公司與其請公關顧問，不如花多啲心機去疏導千禧代員工。