囡囡面試老公淨玩手機吳若希夫妻感情淡薄

囡囡面試老公淨玩手機
吳若希夫妻感情淡薄

【爆相爆片】吳若希跟澳門闊少老公何兆鴻(Alex)育有囡囡Giselle(乳名淼淼),日前二人帶淼淼到幼稚園面試PN班,被讀者黃小姐透過「爆相爆片」分享,吳若希着白恤衫襯黑色背心裙的斯文打扮現身。

日前陪囡囡到幼稚園面試的吳若希,其夫一直掛着玩手機。讀者提供圖片

吳若希對小朋友很有耐性。讀者提供圖片

吳若希昨日出席活動時承認與丈夫不熟,話題只講囡囡或工作。

「好乖冇扭計」

黃小姐說:「入到學校吳若希刻意背住門口企,全程好有耐心陪囡囡玩,不過佢老公就掛住玩手機,似乎唔係好熟悉程序,因為入課室已經開始計分,2nd in父母要答問題,應該要表現得好熱衷,我見到吳若希都有啲黑面睥住老公,不過佢囡囡就好乖,冇走嚟走去,亦冇扭計。」早前吳若希在社交網展開「30 days婚變challenge」,連續30日讚老公為婚變闢謠。

不過吳若希昨日到尖沙嘴出席美容活動時,就否認向老公黑面,一臉倦意的她,表示早上帶淼淼上興趣班,近日又忙於陪囡囡到四、五間學校面試。提到讀者爆料見到她帶囡囡面試,她指該所是自己最心儀的學校,但沒印象曾對丈夫黑面:她說:「我好少公開場合黑佢面,最多只係冇表情,返屋企先反白眼,唔覺當日佢做過乜,有女嘅時候我係唔理老公。我哋只係一齊去,當日怕阿女等太耐,就記得叫老公陪阿女行一陣,冇幾耐就輪到我哋。」

話題講工作

言語間令人覺得夫妻感情淡薄,吳若希承認:「係,唔係好熟,我哋好少傾兩個人嘅嘢,話題都係講個女,或者講工作。」她表示老公由澳門搬來港居住,因朋友不多,已介紹朋友給他認識,而本月23日是囡囡生日,一家會到迪士尼慶祝。
採訪:皓騫、王連連
攝影:沈健程