老友記曾智華在專欄寫「你炒，我又炒」，幾搞笑，但又笑唔出，因為過往傳媒炒人，皆與左丁山無關，既然大家不相識，除咗嘆息一聲，寄以同情之外，唔會有多大感覺，但呢次曾智華所講嘅傳媒機構炒人，慘聞魷魚香者有左丁山相識十幾年以至近二十年嘅朋友，就真係為佢地難過。自己成日話傳媒生態大變，受社交網站及互聯網新聞無處不在嘅影響，全世界傳統媒體都備受威脅，掙扎求存。從業員無不膽戰心驚，恐怕終有一日加入失業大軍。好嘞，雖然講得夠多，但卒之見到相熟友人真係接到大信封，確係幾難過，尤其是收到短訊：「我家有兩老要照顧。請幫幫忙。」心中為之一酸。
各公司炒人，媒體炒人，左丁山見得多，甚至乎親手遣散員工，執笠收檔，但從未下過指令要年資長、人工比較高、工作經驗豐富嘅人士離職，除非佢地嚴重失職。最近十幾年嚟，不少媒體競爭力減退，左丁山認為未必純粹是收入不足嘅壓力太大，而係裁員減薪，替換人手嘅手法不妥當，例如一到裁員便首先送走年老員工（因薪水較高），或服務年期長嘅中年當打員工（因為薪水或已到幾萬銀一個月）；冇人做嘢又點呀，易到極，以新手替換方式，以做咗兩三年嘅初級編輯代替之。你估換螺絲釘咩，新人（薪水較低）頂舊人，點會維持原來文字、編採、播音、出鏡、上網嘅質素？左丁山見過一啲新人寫財經稿，連WTI與Brent兩種石油價格都分辨唔出，將油價調轉嚟報，而佢嘅上司編輯，只係做咗「財經版」兩年，睇稿睇唔到錯誤，照樣出街。又見到一啲報紙財經編輯講地產，不知道1990年代有惠州爛尾樓事件（《壹週刊》當年報導甚詳）。呢類現象，在不止一種媒體、不止一張報紙出現，咁搞法，媒體為咗「生存」，不斷以新人換舊人，以低薪換高薪，以為係降成本，其實係慢性自殺。有時索性唔換人，就吩咐在職舊人走多一步，一個人做幾樣嘢，於是乎舊人忙得要死，忙中有錯，在所多有，鬧佢都無補於事。
香港失業率係好低（2.8%），但媒體人員轉行，最易轉做公司公關，不過只限於記者編輯類，後勤人員要轉行重新嚟過，梗係辛苦好多，如受生活所逼，轉行做物業保安員就怕有必要。一位物業管理總裁經常對左丁山講：「傳媒係夕陽行業，物業管理係朝陽行業。歡迎你轉介朋友轉行！」