HK Sevens（香港國際七人欖球賽）今天起一連三日在香港大球場舉行。兩位應屆大專欖球賽冠軍代表、城大法律系的何沅珊（Rachel）及環境政策系的何雋茵（Pinky），各用「私己錢」買了價值$1,950的三天套票，她們說：「這價錢買到一個放鬆、好玩、有氣氛又好波連場嘅周末，好抵！」（香港國際財經76及有線662台今日9:45am直播）
記者：徐嘉華
攝影：夏家朗、徐嘉華
每年HK Sevens令到四萬座席的大球場變得熱鬧，三天的比賽集世界各地最頂級勁旅，包括斐濟、新西蘭等，緊張刺激不在話下，吸睛的還有一班扮鬼扮馬的七欖球迷，有的金正恩上身、有的是特朗普、又有純情白雪公主，還有球迷玩得瘋狂的南看台，這些都是香港七欖獨有。不要看90後的Rachel和Pinky年紀輕輕，她們入大球場的經驗多達八次以上，隨時比你我還多。
大專賽助城大奪冠
七欖的門票分配，有九成是在香港本土發售，只有一成是海外售票，本土發售包括作內部認購的本地欖球會、體育總會、各贊助商等；據去年10月香港欖總的公佈，單日門票有9,000張作公開抽籤，抽中者每人最多購買兩張成人門票，希望有更多市民入場觀看比賽；不過，每年七欖門票都供不應求，像Rachel及Pinky，她們是透過所屬的球會購買，每人限買一套。
單日票價由$350至$800不等，三天套票公價$1,950不是小數目，兩位大專生為何如此捨得？可能就是欖球的魅力所在，嬌滴滴的二人如數家珍，這畢竟是她們從小玩到現在的運動，兩人在二月的大專女子欖球賽決賽，協助城大奪冠。
撞瘀斷鎖骨未驚過
訪問當天是她們的日常生活，早上上學，晚上練習，最忙的時候每星期練四晚，又球會練習、又大專練習，周末打聯賽，24歲的Pinky說：「其實有時見到同學、朋友出街玩，我就要練波，都會有啲唔開心，但回想得到嘅，包括大專冠軍，就乜都值得。」23歲的法學院學生Rachel則稱：「我個系好少有人玩欖球運動，雖然話我哋好多時課餘都要練波或者打比賽，但就訓練到時間管理能力，同一班志同道合嘅朋友一齊打波好開心。」
還有一個好處，就是欖球可以訓練她們堅毅過人，兩位身上的瘀痕只是小事，Rachel曾手指骨斷裂，Pinky更曾鎖骨斷裂，做過兩次手術；相信換作一般90後女生，一早就打退堂鼓，皮膚白晳，右邊大腿上一大片瘀痕仍未消的Pinky說：「瘀痕唔會留喺身，一星期左右就會散，斷鎖骨嗰次都冇太擔心，手術後我啲骨比以前更強，冇乜嘢嘅。」
扮「小女警」好enjoy
多得每年一度在大球場舉行的七欖氣氛冠絕所有世界系列賽站，加上香港男子七欖隊去年在雅加達亞運歷史性奪金，兩位大專生認為，這些因素令欖球漸漸在香港普及，不過大球場就只有四萬座席，不是人人都能入場，Rachel及Pinky每年都是透過她們所屬球會買票，只要是會員及有參加本地比賽，都可以一人買一套。
二人亦曾扮鬼扮馬入大球場看比賽，Rachel透露之前扮過「飛天小女警」，Pinky就扮過「大力水手」，她們不約而同說：「HK Sevens吸引之處，係一年得一次嘅大型欖球賽，全世界最top球隊都嚟香港，好享受同志同道合嘅朋友一齊開心睇波，仲有場內氣氛，好多人扮鬼扮馬，目不暇給，3日$1,950好抵！」這兩位大專生亦試過滿18歲後走進18禁的南看台，Pinky說：「每年都會走入南看台體驗一下熾熱氣氛，總覺得南看台啲人好嘈，所以入去一陣就撤退。」
問她們今年會扮甚麼入場，她們都表示還在考慮，問到追捧的球隊，她們異口同聲說支持香港隊：「佢哋喺亞運奪金，我哋都有信心港隊可以贏外圍賽。」香港男子七欖隊今天在大球場亮相，出戰外圍組比賽，12支外圍組球隊中勝出一隊，就可躋身明年世界系列組種籽組。