衞冕嘅曼城周三晚喺英超主場以2:0贏咗卡迪夫城，喺聯賽榜反超利物浦一分，升上榜首。
主隊前鋒阿古路受傷，領隊哥迪奧拿亦明顯有後顧之憂，刻意收起多位常規正選，不過實力仍然明顯佔優。上半場六分鐘，曼城中場奇雲迪布尼窄位抽射，轟入一球世界波，客隊門將艾法列治欲救無從。去到19分鐘，曼城左閘辛真高受傷退下火線，由基爾獲加入替，呢個亦係曼城今場唯一一次嘅調動。「藍月」完半場前再入多球，加比爾捷西斯禁區內傳畀利萊辛尼，佢第一時間左腳抽射破網，曼城最終憑呢兩個入波輕取卡迪夫城，全取三分。賽後佢哋以80分反壓少1分嘅利物浦升上榜首。
至於車路士就喺主場3:0輕取白禮頓，佢哋今場贏得相當輕鬆，上半場38分鐘就先開紀錄，首次喺英超正選上陣嘅赫臣奧杜爾傳中，基奧特第一時間撞射得手。換邊後，車路士喺60分鐘增添紀錄，夏薩特喺禁區邊右腳妙射遠柱得手，三分鐘後再有羅夫度斯卓克入番球一模一樣嘅波，最終球隊以3:0輕取白禮頓，賽後以32戰得63分升上第5，領先曼聯兩分。
另一支倫敦球會熱刺就喺新落成嘅主場進行首場正式賽事，結果憑孫興民同基斯甸艾歷臣喺下半場嘅兩個入波，以2:0贏咗水晶宮，總算喺新球場有個好開始。
