公民黨13歲生日，噚日喺金鐘名都酒樓以「並肩向前」為主題開party，事前講明唔請官員，但現場政商界雲集，仍然星光熠熠，民主派友好固然現身，建制派「班長」廖長江、新民黨主席葉劉淑儀、自由黨榮譽主席田北俊等都有到場，屢被公民黨狙擊嘅港鐵都派出車務總監劉天成、英美澳加領事都有畀面出席，不過講到全晚最耀眼嘅，相信係下星期面對佔中案判刑嘅陳淑莊。
澳副領事︰睇《蘋果》學中文
Tanya唱歌一向有水準，佢噚晚為黨慶唱咗梅艷芳嘅《夢伴》，仲有陳百強嘅《深愛着你》幫公民黨籌款，Tanya唱得好聽唔在講，仲炒熱全場氣氛，全場為佢歡呼，雖然Tanya早走，不過八方相信今天星閃閃，唔會剩低Tanya一人漆黑中帶北風中帶着淚。除咗Tanya唱歌，黨主席梁家傑都獻唱一首《My Way》，前執委余若薇除咗拍賣墨寶，仲拎自家設計兼製作嘅小朋友衫，限量五件拍賣，每件盛惠3,888元。最後全晚共籌到285萬。
因為《逃犯條例》修訂，令在場嘅各國領事都成為焦點，雖然各領事唔願多作評論，但都好樂意同傳媒傾偈，話晒喺香港工作，都有展示一下廣東話水平，澳洲駐香港總領事館副領事（政治/經濟）Suzanne Passmore廣東話講得唔錯，仲識睇中文，佢同八方講平時睇《蘋果》新聞學中文，連短片都有睇，話可以學到地道字句喎。
李八方
