民主派人士發起反修訂逃犯條例，商界人士唔敢參加示威，理所當然，鬼叫中國商人天生係怕政府，怕衣食老闆（中國市場）嘅咩。一位退休唔駛憂嘅朋友叫左丁山去參加遊行，左丁山有最佳藉口，3月31日係中文大學校友會聯會盃賽馬日，左丁山係始創者，唔去馬會會畀人懷疑「失聯」㖭，其實呢個修訂，受影響最大者就係商界，啲甚麼總商會、廠商會、工業總會應該贊助遊行至啱。
李家超話如要引渡，必須「部級」要求，普遍城鎮鄉村地區政府，唔可以要求引渡，大家可以放心咁講。其實一般罪犯如涉及殺人、盜竊之類，多在鄉鎮發生，屬小兒科普通案件類，反而涉及商人行賄者，方屬大案，會由部級或以上處理，故此李局長之言，當冇講過可也，商會人士點都聽唔入耳。
商人容易跌入法網，乃內地行事規矩所然。過往港商在內地交社保稅，地方政府話唔駛跟到十足十，交兩三成就得，然後話要交四五成，最近一兩年又改口風，話要交足十成，咁就弊咯，如果地方當權者換人，新官上任追查舊賬，港商個個犯上逃稅罪。唔止商人被追稅，打工仔亦受牽連。一個朋友嘅中學同學曾在珠三角一間工廠做廠長十幾年，五年前因生意不景，老闆要結束營業，將公司剩餘資金賠晒做遣散費，仍然不足數，於是一走了之，去咗加拿大，留下呢位廠長朋友當殃，畀工人包圍，好彩平時識得一啲公安局朋友，憑交情得以受庇護走得甩，即晚返港，一星期後就執埋行李返加拿大。點解咁易去加拿大嘅？主要因為80年代很多廠商，一方面返大陸開廠搵銀，一方面送太太仔女去加拿大入籍，自己做太空人，所以一早攞咗加拿大護照，隨時聲音兩邊走，搵到錢就會唔捨得香港生活，但若一有事打到埋身，唔走回加國求庇護先至奇。陶傑專欄以前講過移民係好事，但入籍外國唱國歌宣誓效忠外國之後，唔該唔好講外國民主唔好，中國模式更具優勢，一國兩制不會變樣呢啲說話。政府一聲修訂逃犯條例，政協大人物立即唱好普通法，就係好例子。又有一啲專欄作家日常居於加拿大，透過電郵交稿，在南華早報不斷抨擊香港民主派搞搞震，最近又連李嘉誠都單打埋，話佢政治失勢，連林鄭月娥在慈山寺開光日，都唔多睇李生，跟住鬧埋林鄭好出席開光大典。唉，呢位老哥既唱歌宣誓效忠加拿大，唔該批評杜魯多啦，講香港事務專做保皇黨做乜喎？