近日689喺fb日日數《蘋果》全版廣告當向北京交功課，引起關心689嘅網民同KOL熱烈討論，齊齊玩夾錢登廣告「深切問候」，當中社民連主席吳文遠火速籌款達標，周一將喺《蘋果》頭版賣廣告問候689，文遠大將軍噚日有去公民黨黨慶，大將軍一現身即時被該黨領導層捉住合照，笑佢因為同689做筆友，已經成為「大紅人」。
籌得16萬元 料可再登一次內頁
文遠大將軍話噚日下畫已就籌款截咗數，共籌得16萬元，遠超預期嘅12萬，所以佢相信周一賣完頭版廣告後，仲可以賣多次內頁廣告。對於巿民今次捐款反應熱烈，文遠大將軍解釋時都忍唔住笑，話自己只諗到一個原因：「就係梁振英實在係太乞人憎嘞！」
大將軍又搞笑話，今次大家籌款反應熱烈，令佢都有少少妒忌，因為社民連過去籌款打官司，啲巿民反應都未有咁踴躍，但佢都明白香港巿民今次係為咗出啖氣，令689唔好咁得戚。對於廣告內容，佢話因為擔心最鍾意告人嘅689會再出律師信，所以佢已同三個律師及《蘋果》法律部嘅同事溝通咗兩日，希望收到好消息，呼籲大家只要周一買份《蘋果》睇吓，就會知道有乜精采內容嘞！