一位讀IT嘅世姪留學回港後，卒之透過電腦J為中介人，已經返工。另一位世姪讀工程，回港後本想加入大公司做初級工程師，希望三十幾年後升到做CEO。點知大公司招聘新人自有一套，新畢業生先要參加中英文考試，及格後再參加「能力測試」Aptitude Test，認為滿意嘞，再參加「小組面試」（group interview），最後還可「生存」者，就參加個人面試，整個程序需時甚久，要六個月先知道是否得到取錄，真係等到頸都長。呢位世姪在家等到發慌，有師兄介紹佢去一間中型公司見一位高層，三扒兩撥，即刻搞掂，一個星期就簽字上班，又可以快得咁緊要？嗰位師兄話：「其實公司好缺人手，名校畢業生，水極有個譜，肯到中小企工作，唔快啲招聘，幾時先搵到人？」
於是世姪F就走馬上任，日日做到忙碌非常，朝早七點半已去到地盤。問佢做中型公司有何感受？佢話：「舊年我去過大公司做實習，得個睇字，唔做影（印）帝已算夠運。嚟咗呢間公司，人手精簡，一返工就要出地盤跟出跟入，老闆吩咐教導點樣施工後，就要上場。合同（全英文）又叫我先睇，其實係每日不停學嘢！」好吖！年青人肯捱，有實際地盤經驗好過只係坐在大公司寫字樓冷氣間，不過當然就係辛苦好多咯！呢日佢要在地盤參加渠務工作，第一次由於經驗不足，放工前遇上小意外，搞到成身米田共，狼狽不堪。佢向老爸訴苦，爸爸教訓佢，「打工係享福呀，學吓嘢先啦。」
肯捱肯搏，加上有名校碩士學位，遲早上位嘅啫！左丁山勸世姪F唔好學埋啲壞習慣，埋怨投訴多，埋頭苦幹少，世姪F話：「其實我開始明白點解香港啲工程費用要咁貴，我哋幾個人，真係做嘢嘅，背後有四五個人負責監工寫報告。叫啲外判工人來開工，佢哋每日過千蚊日薪，九點幾施施然揸架生嚟到，話飲杯咖啡先，十點開工，一點鐘去食飯，四點半就話夠鐘收工，又唔夠膽話佢地，因為老細話周圍冇人肯，嚟呢個地盤開工已算畀面喎！香港高度缺乏勞工，又唔俾輸入，想建造費唔不斷上升都幾難啦！」今時今日係咁嘅咯，工聯會大晒吖嘛。中型企業請到世姪F呢類人有個好處，可順便訓練埋佢成為半個勞工也！問世姪F，幾個月後，假如大公司話請你，你會唔會辭職鬆人？」佢諗咗一輪，然後話：「或者唔會咯，留在細公司可能仲快學到嘢，有足夠實地經驗，他日考Chartered Engineer會容易啲啩？我見一啲朋友在大公司工作，成日在『公司Secrets』爆料鬧公司政策嘅。」講起呢啲「乜乜Secrets」確實令管理層頭痛，日日有人爆料，益晒啲記者！