【黑鏡線索】
Tim Cook講咗轉型變服務收租公司，已經有一段時間，但從外面睇，一直都係未見到實質轉變。上星期個發佈會，Apple終於亮牌。
Apple此前，主要係賣硬件，硬件中主要係賣iPhone。iPhone定期升級，而顧客亦都好定時買新機，係好快樂嘅一個故事，直到有一日，Apple如常升級，但顧客就開始越升越慢。
iPhone係人類史上最賺錢嘅產品，但好日子始終有盡頭，Apple深知，大家亦睇到，iPhone嘅高增長期已成歷史，公司要保持高增長，一係就發明另一個同樣成功嘅產品，一係就喺iPhone上游下游打主意，分其他人一杯羹。
之前顧客準時更新，收錢角度來講，勉強可以當收租，不過係每十八個月收一次租。但當大家越升得慢，收錢節奏越來越唔穩定，越來越唔似收租。當iPhone嘅上游下游，例如每月必收美金九個九嘅Netflix，喺度穩定收租嘅時間，引來要搵出路嘅Apple爭飯食，就好正常。
其實，Apple不嬲都有向上游下游打主意，例如以前個processor係用其他人產品，後來就越來越靠自家研發。當自己嗰格企穩，喺上下游搵機會用自家製組件來加強成個產品嘅競爭力，好合理。但今次唔同嘅係，今次新做嘅幾瓣，每一瓣都係諗住直接向顧客收錢。
一瓣係Apple信用卡，Apple一早有wallet，而wallet裏面就裝各式各樣嘅卡，包括信用卡，而家Apple宣佈，做多一格，連信用卡都做埋。
另一瓣，Apple不嬲有App Store，App Store上高有包括遊戲。而家Apple就宣佈出Apple Arcade，月費打機計劃，打包遊戲收租。
另一瓣，Apple App Store不嬲有新聞App雜誌App，而家Apple就宣佈，出Apple News+月費睇新聞計劃，打包新聞收租。
關於News+，最得人驚嘅係個拆賬分成。App Store收三成，已經成日俾人講用iPhone嘅市佔屈機，貴得好離譜。News+ Apple拆幾多畀自己？五成，50%，一半！呢個數字反映新聞機構嘅牙力，已經低到一個恐怖嘅地步，同時印證咗一種講法：新聞機構，單靠賣廣告其實係生存唔到，慳極都仲係唔夠，一係就品牌堅實到自己直接收用戶租金，一係就摸到其他方法去monetize啲流量。
最後就係Apple TV+，同Netflix直接競爭。只係兩年前嘅事，唔少評論估Netflix值得同將會被Disney或者Apple收購。今時今日，Netflix估值，已經遠超可以被收購嘅規模，而繼Disney宣佈會推出串流平台之後，Apple都宣佈加入戰團。
Apple講服務 考驗品牌效應
Apple收租策略會唔會成功？首先要講明成功嘅定義。要賺到錢，最容易。要做每一瓣嘅第一，就好難，亦都未必係佢嘅目標。要加加埋埋去填iPhone增長走下坡留低嘅窿窿，我估係Apple定畀自己嘅stretch goal。難度係，從核心開始，越打得遠就越遠離自己嘅強區。仲要新戰場嘅business model，同核心好唔同，未必夾到公司DNA。
我自己用Apple咁耐，都只買機而冇用Apple嘅雲端服務，一來Apple一向做服務都係頹，頹到當年教主都喺員工大會開火，二來自己有種傾向，既然硬件已經用Apple，服務就盡量用其他牌子，彷彿本能想減一減concentration risk。到底Apple嘅品牌效應可以輻射到幾遠？嚟緊就會開估。
撰文：宋漢生