貴為國家領導人，梁振英呢排竟然化身《蘋果日報》頭號fans，幾乎日日喺facebook出po，𥄫實敝報有幾多全版廣告同邊個係廣告商。曾向梁掟臭魚治抗議嘅吳文遠，好擔心呢位前特首玩fb玩到儍咗、過份沉迷，上周五喺fb問網民有冇興趣夾錢登廣告「問候」梁振英，一人一嚿水，噚日下晝近4點已經籌到13萬幾，估計下星期初可以見到《蘋果日報》登頭版「問候」689廣告！
不足24小時達標
今次眾籌咁快成事，其實多得毛記電視主持東方昇前日出po又搞登廣告眾籌有關，雖然兩個撞橋，仲一度令杜汶澤誤會文遠將軍偷橋，但東方昇好快出po同大將軍澄清，知大將軍上星期五已經有呢個諗法，仲話都係專心做番個《蘋果》天字第二號忠實讀者，因為天字第一號忠實讀者永遠都係「梁同志」喎！
文遠將軍噚日朝喺fb做live，話原本諗住至少籌3萬蚊，喺《蘋果》登內頁A3全版廣告，如果籌多咗，就登多版內頁廣告，左右齊開，但見大家都想喺頭版問候梁振英，畀多啲人睇到，而登頭版廣告都只係11萬，所以會視乎今日籌到幾多，再決定係兩版內頁定一版頭版，但無論係點，廣告暫定下星期初刊登，等佢哋有足夠時間設計，而且會小心廣告用字，免得俾人告誹謗。
吳文遠話，截至下晝近4點，已經籌到13萬幾，一共有794人捐咗錢，捐得最多嘅一位係5,000蚊，其餘有四人捐咗2,000蚊；今次眾籌唔夠24小時就達標，「證明梁振英好『乸』乞人憎！」佢話原本打算用坊間嘅眾籌網站搞，但因為申請需時，所以最終用咗社民連個網上籌款平台。佢話如果今次有錢剩，會再喺《蘋果》內頁登廣告。
佢又話，雖然草擬咗篇慰問信嚟登廣告，但都想集思廣益，希望徵集網民想像力，幫手設計廣告，用創意顯關懷。歡迎大家喺佢帖文投稿（ https://bit.ly/2UpgUwl ），或者電郵畀佢（mailto:[email protected] ）。
李八方