樂隊RubberBand（RB）前日黃昏現身《蘋果》大樓表演，之後再擔任《動腦Q》嘉賓主持，吸引大批員工捧場，主音6號笑說：「你哋唔使做嘢呀，咁開心！第一次嚟到《蘋果》唱歌畀大家聽，感到好開心，因為去大機構表演畀員工朋友睇，上網見到外國好多都係咁做，反而RubberBand第一次喺香港做，我覺得好開心。」之後唱出電影《逆流大叔》主題曲《逆流之歌》。
觀眾跟着唱
RB還唱出《未來見》、《阿波羅》、《發現號》及《小涼伴》，6號感觸說：「未來見好多時係講相聚，MV裏面泥鯭白髮造型同舊同學聚會，可能今次嘅聚會都係一年一見，可能唔知幾時再見，但每次都好珍惜大家嘅見面時間，我未試過喺咁嘅環境唱，邊度有舞台，我哋邊度都可以去。邊度有人聽我哋唱歌，我哋都會去，所以希望未來更加多見到大家。呢首歌嚟自阿正創作，呢隻歌寫畀陪佢好多年嘅狗仔，將心情變成《未來見》。」觀眾都跟着和唱，6號還跟前排觀眾握手。
擔心會滑牙
至於出道歌《阿波羅》，6號說：「推前十年，大家因為呢隻歌認識我哋，每次又唱呢首歌，我哋都擔心會滑咗牙，但太太話你哋覺得咁箒，可能好多人第一次咁近距離聽，就算係唔係話首本名曲都好，都要用呢種態度演繹。」《發現號》是記載RB第一次演唱會的主題曲。RB的落力演出炒熱現場氣氛，觀眾拍手尖叫，最後RB在徇眾要求下多唱一首《小涼伴》結束音樂會。
另外，RB為《動腦Q》做星級主播，當中短片題問有關微唱會，6號與泥鯭在播片開玩笑說，可能有觀眾在播片期間去沖涼、開大等，全程不停講笑，十分搞笑。
採訪：皓騫
攝影：葉君海