除咗修訂《逃犯條例》，令大孖沙要金睛火眼望實以防中伏外，政府建議徵收一手樓空置稅亦令發展商「紮馬」等打大仗。連喺立法會代表地產商嘅經民聯石禮謙（圖）噚日都喺now新聞台《時事全方位》節目向政府發炮，可見發展商幾咁肉緊。
大嚿石喺節目中好有火，佢話香港立法向來要「公道」，何解今次要抽地產商出嚟納稅？繼而又話「政府有冇諗過係咪真係有責任幫市民買樓？乜政府唔係更應幫助輪候緊好耐都上唔到公屋嘅冇樓市民？」
補飛話支持政府
佢直斥「政府今時今日都唔知自己做緊乜」，只係識攞9,000個空置數字嚟嚇人，而呢個數字明明有水份；同場有人斥政府干預市場，大嚿石仲即時回應五粒字：「衰過共產黨」。
之不過，薑就越老真係越辣嘅，大嚿石鬧完一輪補飛話，「我係建制派，會支持政府」，只要係「好嘅」（千祈唔可以聽漏呢兩粒字）稅項建議，佢都會接受，但接受之中又必須係行得通噃，包括要有公平原則啦，要以滿意紙釐定「空置」定義啦，一千呎以上樓宇應該唔計啦，賣唔到嗰啲就唔應該要交啦……聽到呢度，佢現階段支持定反對？大家心中有數！