說起結婚，以往總是令人想起「大排筵席 」，或者公主式的夢幻婚禮，近年不少年輕新一代，都追求簡約新式婚禮。配合簡約小清新婚禮，新娘會選擇更輕巧的輕婚紗。傳統婚紗的裙襬一般採用拱形傘裙、超長拖尾等設計，相反輕婚紗的裙襬輕盈得多，設計以小拖尾，或者平腳為主。女星如宋慧喬、舒淇也選擇輕婚紗，梅根（Meghan Markle）與哈利王子的英國皇室婚禮，都是穿上簡潔婚紗，素雅的緞面設計，沒有多餘的裝飾刺繡。《add》特別走訪三間婚紗店，讓大家更了解輕婚紗的趨勢與設計。
採訪：陳蔚渝、黃嘉琪
攝影：周樂恒、郭賢興
輕婚紗的興起
初朵hanah bridal店主Macie：「可能同香港環境有關係，因為大家未必再追求喺大型酒店、酒樓搞婚禮，可能係小餐廳，或者細細嘅戶外花園都好滿足，因為呢啲環境，輕便、簡約，有details嘅婚紗變咗係大家追求嘅裙款。」
韓國婚紗品牌Bride and You主打韓式小清新，代理人Joey指出韓國早在五、六年前已開始流行：「我哋見到香港人越來越鍾意搵輕婚紗，所以我哋三年前就引入韓國婚紗品牌。」
本地的Green Wedding店主Winnie表示結婚年輕化是其中一個原因，「𠵱家可能係二十幾歲就會諗結婚，我哋發現好多年輕人未必想搞好隆重嘅婚禮，或者着到好grand。」她也表示簡約婚禮會選擇輕婚紗：「有部份客人舉行簡約啲嘅婚禮，例如包間餐廳去做婚禮嘅時候，如果着套好隆重嘅婚紗，就會變得格格不入。」Winnie笑說：「揀輕婚紗嘅人都好似比較型格、有品味。」
香港女生的喜好
Macie認為香港人追求合適剪裁，「客人冇特別追求牌子同款式，因為我哋係日本、台灣品牌，客人反而想搵一啲更加適合亞洲人身形嘅婚紗，着嘅時候會貼身啲，唔會話覺得膊好闊，腰太鬆。」
Joey認為普遍香港人會選擇歐美款式，因為市面上的亞洲婚紗選擇不多：「新娘見到好多舖頭都只係得歐美婚紗嘅選擇之下，自然就會揀歐美款式。」
Winnie認為明星會影響新娘選擇，笑說：「有人鍾意韓國婚紗，因為韓星影響力大，但幾年嚟以色列婚紗都有好多人搵，不過呢類婚紗比較難carry，通常係see-through、貼身款式，多啲肉都好難着。」
現在流行的款式
Macie認同現在流行簡潔款式，「𠵱家比較多人鍾意淨色，但有少少details嘅婚紗，香港女仔主要鍾意比較傘裙款，或者A-line嘅裙，另外鍾意flexible嘅設計，例如一條裙幾個款，長袖貼身款可以外加半紗，等入場嗰時有拖尾會特別啲。」
Joey介紹了幾款剪裁和特色：「𠵱家一般嘅輕婚紗會有小拖尾款，或者啱啱掂地、平腳款，又有比較調皮、得意嘅七分款式。」她指出韓國人不太喜歡bling bling、 過份華麗，「佢哋認為結婚盡量簡潔，新娘畀人感覺乾乾淨淨、整齊已經係最好形象。」
Winnie則指出輕婚紗的特色：「除咗輕巧，都會加入少少時裝感元素，例如two-piece喱士款式，容易carry，又唔會冇咗婚禮、新娘子嗰種甜美感覺。除咗常用嘅喱士、網紗之外，都有全身絹面，因為有啲新娘子唔鍾意太花巧嘅款式。」
明星着過的效應
Macie認同明星會帶來效應，「因為新聞會報道artist着乜婚紗，一定會有影響，例如丁文淇輯相影得好靚，會令到好多客人想搵嗰件婚紗。」
Joey表示穿Bride and You的香港明星不算多，反而韓星很支持：「韓國女星出活動，流行着白色裙，加上佢哋唔鍾意太華麗款式，所以韓國大部份一線女星，基本上都係品牌客人，包括香港人比較熟悉嘅宋慧喬、朴敏英、朴信惠、秀智等。」
Green wedding的婚紗有陳嘉寶（Anjaylia）、孫慧雪影Pre-wedding時穿過，唐詩詠之前拍攝電視劇時也有穿過旗下品牌。
婚禮更划算的成本
Joey坦言部份客人會認為輕婚紗的成本較傳統婚紗價錢平，但其實視乎品牌的手工和用料：「以我哋品牌為例，無論係喱士、紗裙嘅紗都係歐洲來貨，所以成本相對比較高，同埋唔係大量生產，逐件搵師傅order同全人手做，所以我哋嘅輕婚紗價錢唔會比傳統婚紗平好多。」租輕婚紗的價錢大概三千至五千元，訂做價由八千至一萬八千元不等。
Winnie倒認為輕婚紗成本一定比較低：「因為無論做功、用料、各方面都會比起一般傳統婚紗更加平。」但她亦認為普遍人受「輕婚紗」潮流影響，多於想節省金錢。
更多精采時尚內容，盡在 http://add.appledaily.com。