皇家馬德里由施丹回歸接手領軍，喺星期日西甲領軍第二場比賽，主場迎戰侯爾斯卡。對手雖然係升班馬兼包尾球隊，但皇馬竟然陷於苦戰，先喺開賽三分鐘就失守。皇馬之後由艾斯高同丹尼施巴路斯各入一球反超前，但到74分鐘又失波被逼和2:2。
對34隊西甲隊都有波入
睇住要失分之際，皇馬喺89分鐘由施丹愛將賓施馬救駕，喺禁區射入靚波絕殺侯爾斯卡，險勝3:2。呢個入球對賓施馬嚟講意義重大，首次攻破侯爾斯卡大門，令賓施馬職業生涯喺西甲歷來總共對過34支球隊都全部都入到波，呢個100%完美成績，連球王美斯同基斯坦奴朗拿度（C朗）都未做到。
喺今季之前，賓施馬由2009年加盟皇馬起，對過嘅西甲球隊而又未入過波嘅，仲有基羅納同埋雷加利斯，再加埋今季升班嘅侯爾斯卡，結果佢過晒三關，先喺上年8月尾同9月初兩場西甲，接連喺基羅納同雷加利斯身上梅開二度，到12月首循環作客小勝侯爾斯卡場波食白果，終於到今場臨完場射入重要入球，歷來佢喺西甲對過嘅34支球隊全部都有進賬，一共入咗141球。
施丹：盧卡冇靠父幹
要喺對過嘅對手全部有入波確係唔易，連美斯同C朗都未做到，前者喺西甲對過40隊波，仲未喺一早已經降晒班嘅薩雷斯、梅西亞同卡迪斯入波；至於C朗就對過33隊，差雷加利斯未得，雖然呢隊波仲喺西甲，但C朗就已經轉戰祖雲達斯，要完成大滿貫一樣有難度。
呢場波另一個焦點，係施丹竟然大膽用佢個仔盧卡施丹擔正，20歲嘅盧卡喺上季尾作客賽和維拉利爾2:2一戰，首次為皇馬喺西甲披甲，今次就係佢第一次係喺巴拿比奴球場亮相西甲比賽。不過今場佢表現麻麻，施丹賽後都有解釋呢個用人選擇，話盧卡唔係靠父幹先有正選：「盧卡係我哋三號門將，佢亦喺皇馬低級別效力咗16年，準備好隨時上陣。」