天王級嘅黎明，就算做咗老闆，都周不時善用佢嘅影響力，接拍廣告。噚日係4月1日愚人節，香港警察都應節拍咗段防騙易熱線拍宣傳片，仲搵咗黎天王親自現身加聲演。條片係話飾演騙徒嘅肥仔演員，假扮黎明聲線，利用語音訊息，𠱁少女網上過數呃錢：「我係黎明，我喺內地被富婆操控，逼我拍劇，唔該你用網上過數方法畀我吖，畀我脫身返嚟香港參加金像獎。」
呢段騙徒聲音亦由黎天王親自講，所以個女仔聽多兩次，覺得把聲似就信以為真，立即入錢畀騙徒！之後騙徒搵下一個目標，竟然搵着黎明本人！當黎天王聽到假扮自己嘅語音訊息時，即時好認真咁講：「真係當我懵仔魚呀？我邊會拎到金像獎呀」；黎天王臨尾嚟個自抽，相當搞笑，引來大批粉絲支持。有人話今時今日嘅「明福俠」都唔稀罕拎金像獎！亦有人話黎天王果然係影視娛樂博覽大使，順便宣傳埋金像獎！