拉素星期日作客以1:0小勝國際米蘭，令同日作客以4:1大破羅馬嘅拿玻里喺意甲聯賽嘅第二位更為穩陣。
拿玻里星期日憑米利克、梅頓斯、施蒙尼華迪同埋艾文尤尼斯各建一功，作客以4:1大勝由柏洛迪12碼建功破蛋嘅羅馬，以29戰得63分繼續排喺意甲聯賽榜第2位，而輸波嘅羅馬就以29戰得47分排喺第7位。
雖然落後榜首祖雲達斯15分嘅拿玻里要爭聯賽錦標機會渺茫，但排喺第三位嘅國際米蘭喺同日較後時間主場迎戰拉素，俾後者嘅塞爾維亞中場米連高域沙域喺開波12分鐘頭槌破網而以0:1敗陣。家陣拿玻里領先國際成10分咁多，聯賽榜第二位可以話係夠晒穩陣。
至於全取三分嘅拉素，賽後就以28戰得48分升上第5位，落後踢多1場、排第4位嘅AC米蘭3分。