修訂「逃犯條例」，本以為幾簡單，點知魔鬼在細節裏，討論愈耐，愈使香港人不安，商人更加不安，連到一啲愛國建制派大人物都呼籲擁護香港普通法，令人會心微笑，點解平時口頭上猛講支持依法治國，依法治港之人突然間唔贊成修訂「逃犯條例」呀？原因一字咁淺，想到本身利益，想到內地司法制度及審判程序，想到在內地打官司之辛苦法及離奇怪誕，就算係一級愛國商人呀，都冇法子口硬。呢呢，「南華早報」於3月28日報道，清華大學法律系教授許章潤已被停職，只因許教授夠大膽或大懵，公開寫文章批評習近平政策將中國帶返獨裁專制之路。在領導人不容任何批評，及黨委隨時一聲令下就可炒大學教授嘅地方，法律並無公義可言。
香港應該係整個亞洲，法律公平最為人稱道嘅地區，即使係日本，日產指控前主席兼總裁、法國人Carlos Ghosn虛報薪資，報警將佢拘捕，日本當局將佢監控多日仍未能起訴，已經係違反西方法律權利標準。左丁山有不少東南亞地區經商朋友，佢地一講到法律公道公平公正，就一致讚揚香港（新加坡係墮後之第二名），對香港法治絕不懷疑。十幾年前有一個政府在新人上台後，翻查舊案（二十年前），話發展商行賄買地，告上法庭，初審政府贏咗，被告上訴，上訴得直，上訴法院改判政府賠償被告因官司而導致嘅損失，政府賠償一半之後，拖數不肯支付。點知跟住軍人政府上台，政府又上訴，政府贏晒，除追還「賠款」之外，額外再罰款，再判「法人代表」入獄。在呢啲國家，國民同政府打官司，政府往往輸打贏要；在另一個國家，銀行控告商家欠款不還，要沒收抵押物業，律師收到指示後，兵分兩路，一啲走去法庭申請，另一批老波骨就走去搵法官飲茶灌水，講條件，誠恐對方（債仔）一收到法庭通知，就鬥快搵法官講數也！亞洲係香港法庭最廉潔，最無私嘅嘞，香港人若犯罪，若非證據確鑿，無可辯駁，如有疑點，利益總歸於被告，其他亞洲地方經常並非如此。政府話唔想畀人以為香港係逃犯天堂，其實有誤導之嫌，真正罪犯最鍾意逃往有錢使得鬼推磨嘅地方，有政要可以包庇嘅地方，並非香港也。