第十屆金堯如新聞自由獎得獎名單噚日揭盅，《蘋果》調查組憑「沙中綫工程醜聞」系列報道（下圖），喺紙媒網媒組攞到大獎。
呂秉權︰係技術文
今次大會一共收到69份作品參賽，評審之一、浸大新聞系高級講師呂秉權話，《蘋果》嘅沙中綫報道係技術文，一般記者同專業人士好難駕馭，更何況要由淺入深，令個個都知發生咩事，係相當困難。
一直跟進沙中綫嘅同事話，因為涉及複雜嘅工程同技術資料，採訪工作的確好有挑戰，亦反映𠵱家體制阻止唔到劣質施工，令到「吹哨者」決定向傳媒爆料，由傳媒發揮「第四權」。
紙媒網媒組特別獎就由《明報》記者憑律政司司長鄭若驊大宅僭建報道奪得。至於電台電視組，有線電視記者黃慧茹憑《改革開放四十年》報道系列奪得大獎，now新聞台記者陳偉利就憑回顧汶川大地震10周年《掩埋的真相》報道獲優異獎。
八方喺度恭喜晒得獎行家，同時向所有堅持揭露真相、監督權貴嘅新聞界同行致敬。