逃犯條例豁免商家九宗罪，46減9，還有37條罪恭候小老闆。政治敏感度極高的電騙黨又再活躍，貼地提供「免罪」捷徑：
一，老細，37條當中你唔敢擔保幾時誤墮其中一條，咁啦，一筆過，拍心口保證令你豁免晒佢。新例優惠，中小企可以逐條豁，逐條收費，好似三隧咁，任你揀，好均真。若果你暫時未係老闆，我幫你一條龍做埋商家證，一勞永逸，百分百唔係淘寶貨，放心。
二，老細，保安局話豁免，你信佢？咁天真？咁啦，一筆清，我們內地有人脈，保證令你剔出名單外。舟晒所有人都唔會舟你！新例期間，買一送一，畀一筆，你和令公子或者令公主可以一齊豁免。還有終身豁免兼世襲豁免，價錢另議，OK？
三，老細，有咁耐風流，有咁耐折墮。咁啦，一不做二不休，休妻就唔犯重婚罪啦。一口價，幫你擺平內地和外地小三。不過若然小三有錢過你，夾埋公安城管，隨時買起閣下！所以話有錢大×晒，你明啦。
四，老細，你驚老婆煮重你米告發你？你老婆是……龍蝦？等等冇收線，我幫你轉駁去美國領使館！