熱刺上星期六為熱刺新球場進行第二場測試賽，結果熱刺元老隊以4:5不敵國際米蘭元老隊。
今場表演賽嘅陣容星光熠熠，職業生涯都曾效力國際米蘭嘅愛爾蘭前鋒羅比堅尼，以精采絕倫嘅後腳笠射為熱刺士哥，入波後仲表演佢嘅招牌側手翻，兼扮揸機關槍掃射慶祝。羅比堅尼昔日嘅拍檔貝碧托夫，今場都以頭槌入一球。
眾多亮相嘅前熱刺球星當中，喺下半場入替嘅加斯居尼獲得球迷最響亮嘅歡呼聲。曾經喺90年代效力過熱刺同國際嘅德國前鋒奇連士文，今場為兩隊分別上陣，但佢強調自己永遠同熱刺同在。佢話：「我實在係與有榮焉，好開心可以出席呢場比賽，今日係特別嘅一日。希望呢個新球場可以帶領熱刺邁向未來，贏好多錦標。」
熱刺球場嘅第一場正式比賽，係星期三熱刺主場對水晶宮嘅聯賽。
