林鄭月娥在3月26日宣佈修訂「逃犯條例」，將一啲有關商界嘅9項罪行類別剔除，以求商界議員支持通過修訂條例。
呢次特區政府咁快向商界低頭，令左丁山跌眼鏡，原本以為商界議員會好似民建聯、工聯會啲議員咁，開頭鬧，中間轉軚，最後投降嘅。點解呢次商界議員企到咁硬，逼到特區政府讓步呢？一位商會人士對左丁山講：「喂，殺到埋身，一啲在大陸經商三十年嘅老友已經賣嘢！預備搬返加拿大，你估嘢少呀！一旦條例修訂完畢，商界好多人有得震，冇得瞓呀！故此在商會人人出聲，緊逼商會議員唔准投票轉軚，一定要反對到底。」乜西環冇人出嚟指揮交通，或請去西環食飯咩？呢位人士講：「上次北京開兩會，消息話北京冇主動出聲，修訂係特區政府主意，大家仲唔乘機搞大佢咩！」
泛民因政治而反對修訂「逃犯條例」，商界因自身利益而反對，林鄭、李家超顯然知道唔夠票將修訂嘅原來版本通過，唯有順從商界部份意見，剔除九項有關營商之經濟犯罪，但行賄未包括在內，好多商人內心都係唔安樂。
在大陸做生意三十幾年嘅，邊個夠膽講自己開廠開公司申請批文，申請入伙紙，申請消防准許，申請水電錶安裝時，完全冇送過禮，請過食大茶飯九大簋，安排話事人子女去美國留學等等嘅事情呢？如果完全冇，肯定係一個正人君子，亦肯定喺內地經商搵唔到錢，做來做去得個吉之人！張五常教授三十年前就寫過文章，指在大陸做生意需要潤滑劑也。在經濟管制條例多如牛毛或十分嚴苛之國家（如印尼、印度、中國），商人行賄送禮，根本就係營業成本一部份，唔使啲錢，何來有順利商業運作，活化GDP增長？站在道德高地者可以大罵特罵，但內地不同香港，有乜好罵？一位朋友係董事級數，佢奉大老闆主席之命，回內地做生意多年，設合資公司好多間，大老闆與佢從來不做公司「法人代表」，每次都係叫一個極少或從不返回大陸嘅夥計做法人代表。上星期在中環見到佢，佢話：「我當年係唔係有遠見呀！」林鄭搞「引渡」喎？商人唔反對點對得自己住，點都好，經此一役嚇一嚇，港商、留港陸商必陸續搬錢去美加、新加坡，獅城可能已經掩住嘴笑。有評論話傾斜商界，不顧公義，或有道理，但歸根究底，更不公義嘅地方就是內地之司法程序及法庭有黨委書記之設，黨大於法嘅現象，維權律師可以隨時失蹤，若將港商運回內地，有把握搵到律師辯護咩？完全停止，放棄修訂「逃犯條例」！