一年一度香港國際七人欖球賽（Hong Kong Sevens）本周五開鑼，國際欖球賽未開波前，原來早排壁屋懲教所亦舉行咗一場欖球賽，不過就唔係國際欖球賽玩嗰種，而係一種叫非撞式欖球（Touch Rugby），即係斯文版Rugby。
傳統欖球演變 禁互相衝撞
大家或者對非撞式欖球賽有啲陌生，其實非撞式欖球係由傳統欖球演變出嚟嘅運動，最大特色就係球員唔可以身體互相衝撞，防守球員唔能夠抱人截球，只能以手輕碰進攻球員身體後大叫「Touch」，以示阻止攻勢，防守球員阻止攻勢後亦需馬上退後5米。
講番壁屋呢場比賽，其實係由懲教署同香港欖球總會合辦「非撞式欖球裁判先修課程」，旨在畀青少年在囚人士透過課程學習判斷對與錯，建立自信，增添更生嘅決心，佢哋仲學以致用，即場與香港非撞式欖球代表隊成員進行友誼賽。
懲教署噚日仲推出「達陣Try」嘅短片講呢次活動，香港非撞式欖球代表隊主教練翁志豐喺短片中講，欖球運動難免跌倒同遭遇失敗，要靠自己重新站起來，佢寄語青少年在囚人士如要喺賽事中得分，就必須跌倒後再作嘗試，重新振作，抱緊自己嘅美好人生。
李八方