求驗客手記:美斯發威K.O.武球王

求驗客手記:
美斯發威K.O.武球王

美球王完勝武球王!上星期六場西甲加泰隆尼亞打吡,好多人都期待住美斯大戰武磊一幕,點知武球王冇正選,相反美斯以一個罰球,加埋完場前一分鐘再撞射建功,梅開二度帶領巴塞隆拿2:0贏波,擊敗有武磊後備上陣嘅愛斯賓奴。

國際賽周前五輪西甲正選上陣嘅武磊,今場就先做後備,愛奴對住巴塞亦都排出5-4-1陣式擺明死守,相反巴塞就有報稱國際賽受傷退隊嘅美斯趕及披甲,拍住蘇亞雷斯同菲臘比古天奴組成三叉戟。

省兩粒輕取愛奴

上半場早段,巴塞已佔盡優勢,美斯開賽九分鐘喺禁區左扭右扭擺脫敵衞,搵到空位起腳可惜射高;20分鐘,拿傑迪錫禁區外遠射又柱邊出界,兩隊半場踢成0:0。

去到64分鐘,愛斯賓奴終於換入武磊,求大俠一心諗住可以欣賞「球王對決」啦,但換入武球王嘅愛奴都係冇起色,頂到71分鐘終於失守,美斯禁區頂罰球攻門,雖然冇乜力度,但想幫手解圍嘅域陀辛捷士越幫越忙,唔小心將個波頂入自已龍門,但西甲賽會都將呢球入美斯數。完場前一分鐘,美斯接應後備上陣嘅馬爾甘傳送撞射建功,個人梅開二度,幫巴塞以2:0贏咗呢場打吡戰,而呢兩個入球亦將美斯喺歷來對陣愛斯賓奴嘅入球增至25個。

美球王又破紀錄

今場包辦兩入球嘅美斯搶晒鏡,表現遠勝僅被列為後備,喺64分鐘先入替嘅武磊,而美斯今場帶領巴塞贏打吡戰之餘,仲創下多個紀錄,今場入2球令呢位阿根廷球王第8次單季西甲取得30球或以上;今季各項賽事總入球達41球,亦係佢連續10季入球總數突破40球大關;連同今場,美球王歷年喺西甲累積勝仗場數亦達334場,追平前巴塞門將蘇比沙列特同前皇家馬德里門將卡斯拿斯,加入西甲錄得最多勝仗球員之列,只要下星期西甲再領巴塞作客擊敗維拉利爾,就會爬頭獨佔第一。

另外,美斯今場係第675次幫巴塞披甲,已超越前隊友恩尼斯達674場嘅紀錄,但同史上最多、共767次上陣嘅紀錄保持者沙維仲有段距離。