季軍係美斯、亞軍係美斯、冠軍……都係美斯！搞邊科乜都係美斯？事緣西甲豪門巴塞隆拿最近舉行咗一個「球會史上最佳金球」網上選舉，結果冠亞季軍全部都由美斯一人包辦。
複製老馬入波夠經典
呢次選舉由嚟自160個城市、多達50萬人投票，從會方提供嘅63個球會史上精采候選金球中揀選，結果由美斯喺06/07球季西班牙盃準決賽對基達菲，複製馬勒當拿喺1986世盃8強對英格蘭以一扭五嘅入球，得票率高達45%下成為今次得票率最高嘅金球。
喺上周六西甲加泰隆尼亞打吡戰之前，美斯歷來674次代表巴塞上陣一共入591球，可想而知佢有幾多靚波可以俾球迷挑選。美球王喺14/15球季西班牙盃決賽贏畢爾包一戰，喺邊線一扭四入禁區射近柱建功，獲28%得票率排第2，第3位係佢喺10/11球季歐聯四強嘅西甲國家打吡，同樣係憑一己之力連續擺脫皇家馬德里多名防守球員，殺入中路直闖禁區射入嘅一球，得票率有16%，場波巴塞作客贏2:0兼晉級決賽。
美斯霸晒三甲位置，到第四位終於唔係佢，由沙治羅拔圖喺16/17球季歐聯16強次回合，大逆轉巴黎聖日耳門嘅經典一仗，攻入關鍵嘅最後一球，巴塞亦以6:1反勝晉級。
美斯呻寂寞掛住C朗
有競爭先有進步，美斯咁勁，唔可以否認其中一個原因係佢同一世代，仲有另一位宇宙級球王基斯坦奴朗拿度（C朗）同佢爭逐，遇強就會越強。昔日C朗同美斯同喺西甲球隊效力，09年起鬥足近10年，到今季C朗離開皇馬轉投意甲祖雲達斯，美斯都承認冇咗C朗係有啲寂寞，掛住以往喺西甲同佢鬥個你死我活嘅日子：「我好掛住有C朗嘅西班牙（球壇），有佢喺度真係好好，就算會因為佢贏咗好多錦標令我冇癮。但始終如果佢仲喺西甲，就真係好正。」