喺中國盃季軍戰中國對烏茲別克一役，中國隊前鋒韋世豪從後攔截踢傷對手中場舒克洛夫，令對方要唞兩個月，之後韋世豪俾所屬中超球會廣州恒大罰停賽一個月。喺停賽期間，呢位23歲前鋒除咗唔可以上陣比賽，更唔可以參與操練，亦要寫悔過書，等會方決定會唔會再用佢。舒克洛夫知道呢件事後，噚日喺個人社交網站為韋世豪求情，希望恒大一方可以減輕刑罰從輕發落。