朋友約吃午飯，為方便她們乘地鐵往來，地點就在太古廣場北京樓吃便飯。從座位望出商場，見有兩棵樹狀物體安裝於公眾空間，顏色不時改變，形狀亦變，引以為奇，於是舉起手機拍攝，傳畀肥仔K，叫佢得閒在周日帶仔女嚟到太古廣場參觀吓。點知唔使20秒，肥仔K已傳來仔女在「樹下」的照片，附說明：「去咗嘞，快過你。」
睇商場擺設，通常係比較簡單嘅物件，用來吸引兒童，引誘父母在假期到商場一行，增加人流氣氛嘅啫，但太古廣場呢兩棵「樹」好似並不簡單，究竟係乜呢？小G專做地產訪問，對左丁山講：「太古廣場擺設呀？問吓May姐與Maria姐啦！」May就是May Lam（林珩）、太古地產總經理（公共事務），Maria就是Maria Yu（余似心）、太古地產傳媒關係經理。
一問兩位阿姐，即刻有資料送到，原來喺左丁山眼中之兩棵「樹」，實在係三藩市藝術團隊FoldHaus為太古廣場度身訂做，將內華達州藝術節火人祭（Burning Man）嘅大型作品移來香港重現，兩件藝術裝置之一係Shrumen Lumen，形狀似日式摺紙大型蘑菇，有四個腳踏控制器在旁，觀眾企上去，控制器燈色由紅變到全綠之時，蘑菇就會變色變形，向上下伸張，細路仔一定覺得驚奇好玩，其二係Blumen Lumen，一個大型花卉裝置，觀眾行埋啲，靠近啲，花卉就會開合搖曳變色。用乜物件造成㗎？好環保，用工業紙品，係循環使用物件，再配上4000個LED燈。
呢啲事物就係創意表現，對左丁山之流，諗爆腦都唔識創造出嚟。香港中小學生來此玩賞，或可觸發佢哋嘅創意，學習如何運用最普通物件與科技結合，製成一件七彩幻影嘅藝術品。問阿May點解太古廣場會擺設呢類藝術品，佢話：「太古地產配合藝術月，3月18日至4月14日在太古廣場有ArtisTree，在星街有二手衣物藝術展，紐約藝術家Derick Melander將超過700磅的二手衫褲堆砌成藝術品，類似一棟高樓。奧地利藝術家Willi Dorner帶領表演團隊在太古坊變身成為七彩人體積木……仲有呀，我哋贊助Art Basel開幕！」咁多節目不知有無時間逐一去體會，英國人經營嘅地產商場，除咗識賺錢之外，亦懂得花本錢贊助藝術，擦靚公司image，若非如此，啲歐美藝術家幾難會嚟香港獻技。